Qaza tapqan, múgedektik alǵan medıtsına qyzmetkerleriniń balalaryna qandaı jeńildik bar
ASTANA. KAZINFORM — Densaýlyq saqtaý mınıstriniń orynbasary Tımýr Muratov ortalyq kommýnıkatsııalar qyzmetinde ótken baspasóz máslıhatynda qyzmet babymen qaza tapqan, múgedektik alǵan medıtsına qyzmetkerleriniń balalaryna qandaı jeńildikter beriletinin aıtty.
— «Dıplommen aýylǵa!» baǵdarlamasy aıasynda aýyldyq eldi mekenderge jumys isteýge jáne turýǵa kelgen medıtsına qyzmetkerlerine áleýmettik qoldaý sharalary kórsetilip jatyr. Sonymen qatar jas mamandar kóterme járdemaqy, eń tómengi paıyzdyq mólsherlemeli turǵyn úı nesıesi, eńbekaqyǵa qosymsha tólemder jáne ártúrli áleýmettik qoldaý túrlerin alyp jatyr. Sonyń ishinde mektepke deıingi uıymdarda oryndardy basym tártippen berý, qaza tapqan nemese múgedektik alǵan medıtsına qyzmetkerleriniń balalaryn JOO-ǵa konkýrssyz qabyldaý, jol júrý shyǵyndaryn óteý sııaqty eleýli jeńildikter bar, — dedi vıtse-mınıstr.
Sondaı-aq, ol aýyldarda tapshy medıtsına mamandaryna 8,5 mln teńgege deıin birjolǵy tólem beriletinin eske saldy.
— 2024 jyldan bastap aýyldyq eldi mekenderge jumysqa keletin ótkir tapshylyq mamandyqtary boıynsha medıtsına qyzmetkerlerine 100 eń tómengi jalaqy mólsherinde (8,5 mln teńge) birjolǵy aqshalaı tólemdi kózdeıtin norma engizildi, — dedi Tımýr Muratov.
Buǵan deıin qaıtarylǵan aktıvter qorynan 5,6 mlrd teńge Abaı oblysynda medıtsınalyq nysandar salýǵa jumsalatynyn jazǵan edik.