Qyzmet kórsetýdiń servıstik modeli: jańa Salyq kodeksinde qandaı ózgerister bar

ASTANA.KAZINFORM - Qazaqstanda jańa Salyq kodeksi sheńberinde memlekettik qyzmetter kórsetýdiń servıstik modeline kóshý júzege asyrylýda. Ol artyq ákimshilik sharalardan bas tartýdy jáne kásipkerlerdiń yńǵaılylyǵyna, tsıfrlandyrylýǵa jáne súıemeldeýge nazar aýdarýdy kózdeıdi. 

QR QM Memlekettik kirister komıtetiniń Memlekettik qyzmet kórsetý basqarmasynyń basshysy Dýman Qanseıitov bıznes úshin negizgi ózgerister men artyqshylyqtar týraly aıtyp berdi.

- Memlekettik qyzmetterdi kórsetýdiń servıstik modeli degenimiz, bul – azamattar men bıznes úshin qyzmetterdiń qoljetimdiligine, yńǵaılylyǵyna jáne sapasyna baǵyttalǵan memleket pen qoǵam arasyndaǵy ózara is-qımyldyń zamanaýı tásili, — dep atap ótti Dýman Qanseıitov.

Modeldiń negizgi maqsaty – ákimshilik tásilden tutynýshyǵa baǵyttalǵan formatqa kóshý, ıaǵnı nazardyń bári birinshiden qyzmet alýshyǵa aýdarylady.

Jańa Salyq kodeksinde qandaı ózgerister qarastyrylǵan

• Nóldik eseptilikti avtomatty túrde qalyptastyrý

Eger salyq tóleýshi salyq eseptiligin belgilengen merzimde usynbasa, júıe avtomatty túrde nóldik eseptilikti qalyptastyrady. Bul eseptilikti usynbaǵany úshin habarlama berýden, banktik shottar boıynsha shyǵys operatsııalaryn toqtata turýdan jáne QR «Ákimshilik quqyq buzýshylyq týraly» Kodeksiniń 272-baby boıynsha ákimshilik jaýapkershilikke tartýdy boldyrmaýǵa, osylaısha bıznes úshin jazalaý sharalaryn azaıtýǵa múmkindik beredi.

Memlekettik kirister organdary tarapynan aınalymdar anyqtalǵan kezde ákimshilik jaýapkershilik normalary qoldanylady. Sonymen qatar salyq tóleýshi málimdelmegen kiristerdi óz betinshe anyqtaǵan jáne qosymsha salyq eseptiligin usynǵan kezde jaýapkershilik sharalary qoldanylmaıdy.

• Salyq eseptiligi nysandaryn qysqartý

Salyq eseptiligi nysandarynyń sany 30%-dan astamǵa, ıaǵnı 41-den 28-ge deıin qysqardy. Bul bızneske ýaqyt pen resýrstardy únemdeýge jáne salyqtyq basqarýdy jeńildetýge múmkindik beredi.

· Salyq organdarynyń servıstik toptaryn engizý

Qarjy mınıstriniń buıryǵymen Memlekettik kirister organynyń Servıstik toptaryn qurý týraly erejeler bekitildi.

Servıstik top, bul – salyq organdary qyzmetkerlerinen turatyn mobıldi top, ol salyq tóleýshilerge salyq mindettemelerin oryndaý boıynsha memlekettik qyzmetter men aqparattyq-túsindirý kómegin kórsetedi, sonyń ishinde jeke tulǵalarǵa deklaratsııalardy jasaý jáne tapsyrýda kómek beredi.

Servıstik toptar:

• birinshi jáne ekinshi toptaǵy múgedektigi bar tulǵalarǵa;

• uzaq ýaqytqa eńbekke jaramsyzdyq merzimi belgilenetin aýrýlary bar tulǵalarǵa;

• 80 jastan asqan, kútim men kómekke muqtaj qart adamdarǵa;

• telekommýnıkatsııa jelileri joq shalǵaı eldi mekenderde turatyn jeke tulǵalarǵa memlekettik qyzmet kórsetedi.

Servıstik topty shaqyrýǵa ótinim 1414 nómiri arqyly biryńǵaı baılanys ortalyǵy arqyly beriledi.

Salyq tóleýshilerge salyq mindettemelerin oryndaý boıynsha qandaı kómek kórsetiledi?

Memlekettik kirister komıteti bızneske barynsha «jumsaq súıemeldeý» modelin belsendi engizýde, ol degenimiz – salyq tóleýshini tirkeý sátinen bastap onyń qyzmetin toqtatqanǵa deıin qoldaý kórsetý.

Bul model halyqqa barynsha yńǵaıly kelesi tásilderge negizdeledi:

• mobıldi qosymshalar arqyly jeńildetilgen salyqtyq tirkeý;

• aldyn ala toltyrý jáne avtomattandyrylǵan deklaratsııalaý;

• salyqtardy óńaı tóleý;

• keıbir qyzmetterdi «Azamattarǵa arnalǵan úkimet» memlekettik korporatsııasyna jáne qarjy sektoryna berý;

• eskertý jáne habarlaý boıynsha elektrondyq servıster, onyń ishinde bankterdiń mobıldi qosymshalary arqyly;

• jastardyń salyqtyq saýattylyǵyn arttyrý;

• ashyq API-servısterdiń keńeıýi.

Osy is-sharalar aıasynda bolashaq kásipkerlerge arnalǵan «Kalkýlıator» túrinde saýalnama fýnktsııasy ázirlendi. Bul bıznesti tirkeý kezinde paıdalanýshyǵa bıznes júrgizýdiń uıymdyq-quqyqtyq nysanyn (JK nemese JShS), salyq rejımin, tapsyrylatyn Deklaratsııa túrlerin jáne merzimderin anyqtaýǵa arnalǵan aldyn ala aqparat pen usynymdar beredi.

Saýalnama nátıjesinde ár salyq tóleýshige arnalǵan, qoldanatyn salyq rejımi boıynsha Eskertpe qalyptastyrady, onda Deklaratsııa tapsyrý merzimderi, salyq mólsherlemeleri, tóleý ýaqyty jáne taǵy da basqa aqparattar qamtylady.

Bul servıs SAIJ, MKK portalynda jáne «Biryńǵaı jeke kabınet» júıesinde júzege asyrylady, sondaı-aq API-servıs arqyly banktik mobıldi qosymshalar men basqa platformalarǵa biriktiriledi. Bul júıe tek esepti qabyldap, mindettemelerdi baqylap qana qoımaı, salyq tóleýshiniń kómekshisi retinde jumys isteıdi – jeke keńester, eskertpeler men aldyn ala toltyrylǵan nysandar usynady.

Ekinshi deńgeıdegi banktermen yntymaqtastyq

Memlekettik kirister komıteti salyq tóleýshilermen kóbirek baılanys núkteleri bar banktik ekojúıelerdiń múmkindikterin belsendi paıdalanady. Ekinshi deńgeıdegi bankterdiń platformalarynda fıskaldyq baqylaý sharalaryn qoldanbaı suranysqa ıe Elektrondyq servıster men memlekettik qyzmetterge qol jetkizýdi qamtamasyz etetin salyq tóleýshiniń mobıldi kabınetiniń prototıpi jasalady.

MKK servısterin bank ekojúıelerimen ıntegratsııalaý nátıjesinde salyq eseptiligin berýden bastap bereshek týraly habarlamalardy alýǵa deıingi 20-dan astam qyzmet júzege asyryldy. Banktik platformalarda salyq tóleýshiniń mobıldi kabınetin qurý, sondaı-aq baqylaý-kassalyq mashınalardy bankterdiń POS-termınaldarymen ıntegratsııalaý boıynsha jumys júrgizilýde, bul bızneske búkil ómirlik tsıkldy artyq baqylaýsyz súıemeldeýge múmkindik beredi.

Osyǵan deıin 2026 jyly salyq rejımin qalaı tańdaýǵa bolatyny týraly jazdyq.