Qyzmet kezinde qaza tapqan polıtsııa qyzmetkeri «Aıbyn» ordenimen marapattaldy
QONAEV. KAZINFORM — Qyzmettik boryshyn oryndaý kezinde qaza tapqan Almaty oblysy polıtsııa departamenti patrýldik polıtsııa batalonynyń ınspektory, polıtsııanyń aǵa leıtenanty Shalhar Baıjomartov «Aıbyn» ІІІ dárejeli ordenimen marapattaldy.
Memlekettik nagradany marqumnyń ákesine QR Іshki ister mınıstriniń orynbasary Aıdar Saıtbekov Almaty oblysy polıtsııa departamentine jumys sapary barysynda tabystady. Ol otbasyna kóńil aıtyp, aǵa leıtenant Baıjomartovtyń erligi men qyzmetine adaldyǵyn atap ótti.
— Іshki ister organdarynyń qyzmetkerleri qylmysqa qarsy kúreste jáne tártipti qamtamasyz etýde árdaıym aldyńǵy qatarda. Shalhar Baıjomartov óz ómirin qurban ete otyryp, Otanyna adal qyzmet etkenin dáleldedi. Polıtsııa aǵa leıtenanty Shalhar Baıjomartov máńgilikke óz qyzmetine adal, erlikke toly ofıtser retinde este qalady, — dedi Aıdar Saıtbekov.
Eske salaıyq, qaıǵyly oqıǵa 2024 jyldyń 20 jeltoqsanynda bolǵan. Buǵan deıin Almaty oblysynda jol polıtsııasyn kólik qaǵyp, ol oqıǵa ornynda jan tapsyrǵanyn jazǵanbyz.