Qyzmet etý merzimi uzartylǵan vagondardy paıdalanýǵa shekteý engizý qajet — Naǵaspaev

ASTANA. KAZINFORM — Qyzmet etý merzimi uzartylǵan vagondardy paıdalanýǵa shekteý engizý qajet. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty. 

— Qyzmet etý merzimi uzartylǵan vagondardy paıdalanýǵa shekteý engizý qajet. Osy shara otandyq temirjol kólik óndirýshilerin qosymsha tapsyrystarmen qamtamasyz etýge múmkindik beredi. Búginde otandyq óndirýshilerden QTJ úshin júk vagondaryn satyp alýǵa protsenttik mólsherlemeni sýbsıdııalaýǵa bólingen qarajat kólemi tómen. Osyǵan baılanysty, atalǵan jumystardy júzege asyrý úshin jetkilikti qarjylandyrýdy qamtamasyz etý máselesin pysyqtaý qajet, — dedi mınıstr.

Sonymen qatar ol óndiristerdi tapsyryspen qamtamasyz etý maqsatynda uzaq merzimdi perspektıvada offteık-kelisimsharttar jasaý máselesin pysyqtaýdy usyndy.

— Máselen, bıyl Qazaqstan vagon qurastyrý kompanııasynyń QTJ-ǵa júk vagondaryn jetkizý kelisimsharty aıaqtaldy. Offteık-kelisim-sharttar otandyq óndirýshilerdi turaqty tapsyrys kólemimen qamtamasyz etip, óndiristik qýatty josparly túrde tolyq paıdalanýǵa múmkindik beredi. Sonymen qatar, vagon shyǵaratyn zaýyttar óndiriste otandyq materıaldar men bólshekterdiń úlesin kóbeıtýge mindetti bolady. Qazirgi ýaqytta mınıstrlik barlyq vagondar men lokomatıvterge qatysty zaýytta bólshekterdi jınap, daıyn ónim shyǵaratyn kelisim jobasyn ázirleı bastady, — dedi Ersaıyn Naǵyspaev.

Buǵan deıin Kólik mınıstri Nurlan Saýranbaev temirjol jelisiniń jalpy paıdalaný uzyndyǵy 16 myń shyqyrymdy quraıtynyn, tozý deńgeıi 57 paıyzǵa jetkenin aıtqan edi.