Qyzmet barysynda qaza tapqan feldsher Uldana Myrzýanǵa arnalǵan eskertkish taqta ornatyldy
ASTANA. KAZINFORM — Astanada qalalyq jedel medıtsınalyq járdem stantsııasy ǵımaratynyń qabyrǵasyna qyzmettik mindetin oryndaý barysynda qaza tapqan feldsher Uldana Myrzýanǵa arnalǵan eskertkish taqta ornatyldy. Bul týraly elorda ákimdiginiń resmı saıty jazdy.
Eskertkish taqtanyń ashylý rásimine Densaýlyq saqtaý mınıstri Aqmaral Álnazarova men Uldana Myrzýannyń anasy Sálıma Ishanqulqyzy, týystary jáne jedel medıtsınalyq járdem stantsııasynyń qyzmetkerleri qatysty.
– Uldana Qaldarhanqyzy 2017-2021 jyldary Astana qalasyndaǵy «Danalyq» kolledjinde emdeý isi mamandyǵy feldsher biliktiligi boıynsha bilim alyp, oqý ornyn úzdik dıplommen bitirgen. Búgin sol kolledjde Uldananyń atyndaǵy arnaıy aýdıtorııa ashylady. Oqý bitirgeli 4 jyl kóleminde ómiriniń sońyna deıin Astana qalalyq Jedel medıtsınalyq járdem stantsııasynda eńbek etti. Jas bolsa da, kásibı adaldyǵymen kózge túsken jáne shuǵyl jaǵdaılarda óz betinshe sheshim qabyldaı alatyn bilikti mamanǵa aınaldy. Uldana Qaldarhanqyzynyń týǵan-týystaryna, anasyna, jaqyndaryna, jubaıyna, jedel járdem qyzmetkerleri ujymyna Qazaqstandaǵy medıtsına salasynda jumys istep júrgen 300 myńnan asa qyzmetkerdiń atynan, óz atymnan qaıǵyryp, kóńil aıtamyn, – dedi mınıstr.
Sonymen qatar mınıstr Uldarhan Myzýannyń esimi otandyq medıtsına tarıhynda jazylatynyn atap ótti.
Uldana Myrzýannyń anasy Sálıma Ishanqulqyzy marqum qyzyna qurmet kórsetilip jatqany úshin Densaýlyq saqtaý mınıstri men medıtsına salasynyń qyzmetkerlerine alǵysyn aıtty.
Astana qalalyq jedel medıtsınalyq járdem stantsııasynyń qyzmetkerleri eskertkish taqta aldyna gúl shoqtaryn qoıdy.
Eskertkish taqtanyń ashylýynan keıin jedel medıtsınalyq járdem stantsııasy mekemesinde jaıylǵan dastarhan basynda Astana qalasyndaǵy Sheıh Kýnta qajy meshitiniń bas ımamy Bekqoja Ómirzaq marqumnyń rýhyna arnap Quran baǵyshtady.
Esterińizge sala keteıik, kásibı qyzmetin atqarý barysynda aýyr jaraqat alǵan feldsher Uldana Myrzýan 18 qarasha kúni aýrýhanada qaıtys bolǵan edi.
Eske sala keteıik, buǵan deıin Astananyń Almaty aýdanynda, Táýelsizdik dańǵyly, 24B mekenjaıynda toǵyz qabatty turǵyn úıdiń qasbetinen kirpishten jasalǵan syrtqy qaptama men kondıtsıoner qondyrǵysy qulap, bes adam zardap shekkenin jazǵan bolatynbyz.
Uldana Myrzýan 18 qarashada qos taǵdyrdy aman alyp qalyp, ózi baqılyqqa attanǵan edi.
Keıin Prezıdent qaza tapqan feldsherdi «Erligi úshin» medalimen marapattady.