Qyzynyń urlanǵanyna 49 jyl: japonııalyq ana Soltústik Koreıaǵa talap qoıdy
ASTANA. KAZINFORM – Soltústik Koreıa 1977 jyly 13 jasynda urlap áketken japon qyzy Megýmı Ekotanyń anasy arada 49 jyl ótse de, qyzyn elge qaıtarý máselesin sheshýge shaqyrdy. Qazir 90 jastaǵy Sakıe Ekota qyzynyń taǵdyryna áli de alańdaıtynyn aıtty. Bul týraly Kyodo News agenttigi jazdy.
Megýmı Ekotanyń anasy bul málimdemeni senbi kúni beınebaılanys arqyly qatysqan is-sharada jasady. Jeksenbi, 15 qarashada, onyń qyzynyń joǵalǵanyna 49 jyl toldy. Megýmıdi 1977 jylǵy 15 qarashada keshkisin Japonııanyń Japon teńizi jaǵalaýyndaǵy Nııgata prefektýrasynda mektepten úıine qaıtyp bara jatqan jerinen urlap áketken.
Іs-sharaǵa qatysqan shamamen 700 adamnyń aldynda Megýmıdiń inisi Tetsýıa máseleni sheshý úshin eki el basshylary deńgeıinde kelissóz júrgizýdiń mańyzyn atap ótti.
– Bul – jumys deńgeıindegi emes, joǵary deńgeıdegi kezdesýler arqyly sheshiletin másele, – dedi ol.
Japonııa premer-mınıstri Sanae Takaıchı jeksenbi kúni X áleýmettik jelisindegi paraqshasynda barlyq urlanǵan azamattyń Otanyna dereý oralýyna múmkindik jasaý óziniń «mindeti» ekenin jazdy.
Ol premer-mınıstr qyzmetinde bolǵan kezeńde bul máseleni sheshýde «betburys jasaýǵa» ýáde berip, Soltústik Koreıa basshysymen sammıt ótkizýden úmitti ekenin bildirdi.
Japonııa úkimeti 1970–1980 jyldary Soltústik Koreıa urlap áketken 17 azamatty resmı túrde moıyndaǵan. Olardyń beseýi 2002 jyly elge qaıtaryldy. Sonymen qatar Tokıo Soltústik Koreıany basqa da kóptegen adamnyń joǵalýyna qatysy bar dep aıyptaıdy.
Elge qaıtarylǵan bes azamattyń biri – 67 jastaǵy Hıtomı Soga. Ol ózimen birge urlanǵan anasy Esıdiń oralýyn áli kútip júr.
– Onyń ár kúnin qalaı ótkizip jatqanyn oılasam, janymdy qoıarǵa jer tappaımyn, – dedi ol is-sharadan keıin jýrnalısterge.
Sondaı-aq ol anasynyń elge oralýyn tilep, duǵa etýdi jalǵastyratynyn aıtty.
Aıta keteıik, adamdar nelikten iz-túzsiz joǵalyp ketetininiń áleýmettik jáne psıhologııalyq sebepteri jaıly jazyp edik.