«Qyzyljar – Moıynty» temir joly qurylysy bastalady

ASTANA. KAZINFORM – Dostyq-Moıynty jáne Almaty aınalma temir jolynyń qurylysy bıyl aıaqtalady. Bul týraly Kólik mınıstrliginiń Temirjol jáne sý kóligi komıteti tóraǵasynyń orynbasary Nurjan Kelbuǵanov aıtty.

- Memleket basshysy Qazaqstan Eýrazııa qurlyǵynda tranzıttik habqa aınalýy qajet dep tapsyrma bergen. Soǵan baılanysty temirjol salasynda 1 300 shaqyrymdy quraıtyn 4 iri ınfraqurylymdyq joba iske asyrylyp jatyr. Atap aıtsaq, Dostyq-Moıynty jáne Almaty aınalma jobasy, Darbaza-Maqtaral jáne Qytaı elimen qosatyn Aıagóz-Bahty temirjol ótkeli salynyp jatyr. Jospar boıynsha eki joba, ıaǵnı, Dostyq-Moıynty jáne Almaty aınalma jobasy bıyl bitip, qoldanysqa beriledi, - dedi ol Ortalyq kommýnıkatsııalar qyzmetindegi brıfıngte.

Onyń aıtýynsha, Memleket basshysynyń keńeıtilgen Úkimet otyrysynda berilgen tapsyrmasyna sáıkes, Transqazaqstandyq temirjol dálizin damytý úshin uzyndyǵy 366 shaqyrym bolatyn «Qyzyljar – Moıynty» jańa temir jol jelisin salý bastalady. Bul Transkaspıı kóliktik halyqaralyq baǵytyn 150 shaqyrymǵa qysqartýǵa múmkindik beredi.

- Munan bólek, ınfraqurylym qýattylyǵyn arttyrý jáne ótkizý qabiletin keńeıtý maqsatynda 700 shaqyrym bolatyn «Altynkól – Jetigen» jáne «Beıneý – Mańǵystaý» ýchaskeleri jańǵyrtylady. Sondaı-aq, jalpy uzyndyǵy 1 200 shaqyrym «Qyzyljar – Sekseýil», «Shalqar – Beıneý» ýchaskelerinde avtobloktaý jańa júıeleri engiziledi. Joǵaryda aıtylǵan jobalardy osy jyldyń sáýir aıynda bastaý josparlanyp otyr, - dedi Nurjan Kelbuǵanov.

Buǵan deıin Prezıdent «Moıynty – Qyzyljar» baǵytynda jańa temir jol qurylysyn bastaýdy tapsyrǵanyn jazǵan edik.