«Qyzyljar» fýtbol klýbynyń qarjylaı qıyndyqqa ushyraǵany ras pa
PETROPAVL. KAZINFORM – Petropavldaǵy «Qyzyljar» fýtbol klýby oıynshylaryna, jattyqtyrýshylarǵa qaryz.
Áleýmettik jelide fýtbolshylardyń ekinshi kún jattyǵý jasaýdan bas tartqandyǵy týraly aqparat tarady.
Fýtbol klýbynyń baspasóz qyzmeti osyǵan oraı túsinik berdi.
- Tapsyrys berýshi men «Qyzyljar» fýtbol klýby arasyndaǵy qarjylandyrý týraly sharttyń ýaqtyly jasalmaýyna baılanysty 2025 jyldyń qańtar–aqpan aılary úshin eńbekaqy tólenbedi. Bul jaǵdaı klýbtyń emes, tapsyrys berýshiniń kinásinen týyndady. Qazirgi ýaqytta bul másele sheshimin tapty jáne jaqynda barlyq bereshek tolyq óteledi dep josparlanǵan, - delingen jaýapta.
Sonymen qatar, maýsym aıynyń da jalaqysy keshiktirilip jatyr.
- Tapsyrys berýshi tarapynan qujattardyń ýaqytyly óńdelmeýi saldarynan jalaqyny tóleý keshiktirildi. Klýbtyń bedelin túsirgisi keletin keıbir múddeli tulǵalar men úlestes aqparattyq resýrstar arqyly taralyp jatqan jalǵan aqparatqa senbeýge shaqyramyz.
«Qyzyljar» fýtbol klýby men onyń basshylyǵy oıynshylardyń, qyzmetkerlerdiń jáne jankúıerlerdiń múddelerin qorǵaý maqsatynda barlyq qajetti sharalardy qabyldap jatyr, - dep jaýap berdi baspasóz qyzmetindegiler.
Buǵan deıin Germanııany fýtboldan álem chempıony qylǵan bapker Ózbekstan fýtbol qaýymdastyǵymen kelissózder júrgizip jatqanyn jazǵan edik.