Qyzyljar áýejaıynda bolashaq ushqyshtar daıarlyqtan ótedi
PETROPAVL. KAZINFORM - Petropavldaǵy áýejaı bazasynda Azamattyq avıatsııa akademııasy kýrsanttarynyń ushý daıarlyǵynyń tájirıbelik bóligi ótetin bolady.
Joba bolashaq avıatsııa mamandarynyń kásibı daıarlyǵyn jetildirýge múmkindik beredi.
«Qyzyljar» halyqaralyq áýejaıyna Azamattyq avıatsııa akademııasynyń Diamond DA40 ushaǵy keldi. Bul ushqyshtardy bastapqy daıarlaýǵa arnalǵan bir motorly, tórt oryndyq zamanaýı jattyǵý ushaǵy.
Endi kýrsanttar aerodrom bazasynda belgilengen baǵyttar boıynsha ushý jattyǵýlaryn oryndap, pılotaj elementterin pysyqtaıdy. Sondaı-aq kózben baǵdarlaý jáne aspaptar arqyly qonýǵa kirý tásilderin meńgerip, túngi ushýlardy oryndaıdy.
- Bul - biz úshin mańyzdy kezeń. Óıtkeni «Qyzyljar» aerodromy Qazaqstannyń azamattyq avıatsııasy úshin bolashaq ushqyshtardy praktıkalyq daıarlaýdyń tolyqqandy oqý-jattyǵý alańyna aınalyp keledi, - dedi «Qyzyljar» halyqaralyq áýejaıynyń avıatsııalyq qaýipsizdik jónindegi dırektor orynbasary Anar Zeınıl.
Aldaǵy ýaqytta Azamattyq avıatsııa akademııasyn Petropavl qalasyna kóshirý máselesi de qarastyrylyp jatyr.
- Oblys ákiminiń jáne Azamattyq avıatsııa akademııasynyń basshylyǵy birlesip, aýqymdy jumys atqardy. Aldaǵy ýaqytta Akademııa Petropavlǵa qonys aýdarý týraly sheshim qabyldaıdy dep úmittenemiz. Bul óz kezeginde qalada avıatsııa baǵyty boıynsha mamandar daıarlaıtyn tolyqqandy joǵary oqý ornynyń ashylýyna múmkindik beredi.
Árıne, bul úshin saıası sheshim qajet. Qazirgi tańda osy baǵytta jumys júrgizip jatyrmyz, - dedi SQO ákiminiń orynbasary Nurlan Keńesov.
Buǵan deıin Astanada orman órtteriniń saldaryn joıýǵa qatysqan áskerı ushqyshtar marapattalǵanyn jazǵan edik.
