Qyzylshanyń taralýyn vaktsınatsııa toqtatady: elordanyń bas sanıtar dárigeri úndeý jasady
ASTANA. KAZINFORM – Elordada qyzylsha aýrýyn juqtyrý jaǵdaıy údep barady. Olardyń basym bóligi balalar arasynda anyqtalyp jatyr.
Qyzylshanyń aldyn alýdyń jalǵyz tıimdi joly – vaktsınatsııa. Immýndaýdyń mańyzdylyǵy týraly Qoǵamdyq kommýnıkatsııalar qyzmetinde ótken brıfıngide Astananyń bas memlekettik sanıtar dárigeri Aıgúl Shaǵaltaeva aıtty, dep jazdy qala ákimdiginiń resmı saıty.
Dúnıejúzilik densaýlyq saqtaý uıymynyń derekterine sáıkes, ınfektsııanyń taralýyn toqtatý úshin halyqtyń keminde 95 paıyzy ekpe alýy qajet. Óıtkeni dál osy deńgeıde turaqty ujymdyq ımmýnıtet qalyptasady. Qazaqstanda qyzylshaǵa qarsy vaktsınatsııa Ulttyq ekpe kúntizbesi aıasynda júrgiziledi: alǵashqy doza 12 aılyq kezde, ekinshi doza 6 jasta salynady.
Vaktsınanyń tıimdiligi 95 paıyzdan asady, bul onyń joǵary senimdiligi men qaýipsizdigin dáleldeıdi. Qazirgi ýaqytta Astana qalasynyń emhanalarynda josparly ekpeni ótkizip alǵan balalar men jasóspirimderge «qýyp jetý» vaktsınatsııasy júrgizilip jatyr. Sonymen qatar egilmegen nemese vaktsına mártebesi belgisiz adamdarǵa naýqaspen baılanystan keıin 72 saǵat ishinde shuǵyl ımmýndaý jasalady. Bul aýrýdyń damýyn boldyrmaýǵa jáne vırýstyń taralý tizbegin úzýge múmkindik beredi.
Balalardy vaktsınatsııalaý ómirlik mańyzǵa ıe. Óıtkeni ol qaýipti juqpaly aýrýlardan qorǵaıdy, ımmýnıtet qalyptastyrady jáne qoǵamdaǵy ujymdyq qorǵaýdy kúsheıtedi. Vaktsınalar qaýipsiz ári tıimdi, aýyr asqynýlardyń aldyn alady jáne qyzylsha nemese polıomıelıt sııaqty aýrýlardyń qaıta taralýyna jol bermeıdi.
Ata-analarǵa balany ekpege durys daıyndaý mańyzdy. Balanyń densaýlyq jaǵdaıyn, sozylmaly aýrýlarynyń bar-joǵyn jáne aldyńǵy vaktsınatsııalarǵa bolǵan yqtımal reaktsııalardy eskerý qajet. Mamandar janama áserler bolýy múmkin ekenin aıtady, alaıda egilmegen bala úshin aýrý asqynýlarynyń qaýpi áldeqaıda joǵary.
– Qurmetti ata-analar men Astana turǵyndary! Búginde qyzylshanyń taralýyn toqtatýǵa naqty múmkindik bar – ol úshin jaýapty ári sanaly sheshim qabyldap, vaktsınatsııadan ótý qajet. Balalaryńyzdyń ekpe mártebesin tekserip, vaktsına saldyrmaǵan nemese ótkizip alǵan jaǵdaıda der kezinde ekpe alýdy qamtamasyz etińizder. Naýqaspen baılanystan keıin shuǵyl ımmýndaýdan bas tartpańyzdar. Sebebi bul – tıimdi qorǵanys sharasy. Aýrý belgileri baıqalǵan jaǵdaıda dereý medıtsınalyq kómekke júginińizder, – dep elordanyń bas sanıtar dárigeri astanalyqtarǵa úndeý jasady.
Buǵan deıin 2025 jyly elde qansha zańsyz dári-dármek anyqtalǵanyn jazǵan edik.