Qyzylshamen aýyrǵandardyń 78%-y ekpe almaǵan

ASTANA. KAZINFORM — Qazaqstanda sońǵy aılarda qyzylshamen syrqattanýshylyq qaıta órshidi. Jyl basynan beri el boıynsha 3 343 jaǵdaı tirkeldi. Bul týraly Ortalyq kommýnıkatsııalar qyzmetinde ótken baspasóz máslıhatynda QR DSM Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova habarlady.

Komıtet tóraıymy atap ótkendeı, 2025 jyly qyzylsha kórsetkishi 2024 jylmen salystyrǵanda 6,8 esege tómendegenimen, sońǵy aılarda aýrý qaıta kúsheıe bastady.

— Qarasha aıynda 317 jaǵdaı tirkelse, jeltoqsanda bul kórsetkish 1 127-ge jetti. Bıyl qańtarda 2 048 jaǵdaı anyqtaldy, al 1–18 aqpan aralyǵynda 1 295 jaǵdaı tirkeldi, — dedi Sarhat Beısenova.

Qazirgi ýaqytta aýrýdyń ósýi eldiń 9 óńirinde baıqalady. Atap aıtqanda, Astana qalasynda — 973, Almaty qalasynda — 519, Jambyl oblysynda — 464, Almaty oblysynda — 280, Qaraǵandy oblysynda — 195, Aqtóbe oblysynda — 156, Atyraý oblysynda — 147, Qostanaı oblysynda — 134 jáne Ulytaý oblysynda — 42 jaǵdaı tirkelgen.

— Naýqastardyń basym bóligi - balalar.Jalpy syrqattardyń 72%-y 5 jasqa deıingi balalar arasynda tirkeldi. Onyń ishinde 1 jasqa deıingi sábıler — 24%, 1 jastaǵylar — 23%, 2–4 jas aralyǵyndaǵy balalar — 26%. Syrqattanǵandardyń 78%-y ekpe almaǵandar. Ekpeden bas tartqandar — 56%, medıtsınalyq sebeppen keıinge qaldyrǵandar — 14%, al egý jasyna jetpegen balalar — 30%, — dedi komıtet tóraıymy.

Sarhat Beısenova ata-analardy ekpeni ýaqytyly alýǵa shaqyrdy.

— Vaktsınatsııa — balańyzdy qyzylsha jáne basqa ınfektsııalyq aýrýlardan qorǵaýdyń eń senimdi joly. Ekpe alǵan balalardyń qaýipsizdigi Dúnıejúzilik densaýlyq saqtaý uıymynyń standarttaryna sáıkes qamtamasyz etiledi, — dedi ol.

Aıta keteıik, osyǵan deıin qyzylshaǵa baılanysty dárigerler ata-analarǵa úndeý jasaǵany jaıly jazdyq.