Qyzylshamen aýyrǵandardyń 70% – vaktsına almaǵan balalar

Jyl basynan beri 8 aıda Qazaqstanda 3 myńnan astam adam qyzylshamen aýyrdy. Naýqastardyń 70% astamy – vaktsınalanbaǵan balalar. Bul týraly Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Ázirge esh mektep karantınge jabylǵan joq. Jyl basynan beri 8 aıda 3 myńnan astam adam qyzylshamen aýyrdy. Bul negizinen balalar, ásirese naýqastardyń 70%-dan astamy – vaktsınalanbaǵan balalar. Qyzylsha bizdiń elge shetelden kelgenin aıttym. Keıbir kórshi elderde, Eýropa elderinde aýrý oshaqtary boldy. Qazir ımmýnıteti joq vaktsına almaǵan adamdar aýyrýda. Pandemııaǵa deıingi jyly 13 myńǵa jýyq adam aýyrǵan. Sondyqtan qandaı da bir mektepterdi jabý úshin karantındik sharalardy qabyldaýǵa negiz joq ekenin kórip otyrmyz», - dedi Densaýlyq saqtaý mınıstri Úkimette ótken baspasóz máslıhatynda.

Onyń aıtýynsha, naýqaspen baılanysta bolǵan adamdar vaktsına alady, aýrý oshaqtarynda oqshaýlaý, qyzmetkerlerdi oqytý boıynsha jumystar júrgizilýde.

«Bul jumys júıeli túrde júrip jatyr. Qazirgi ýaqytta vaktsınalar jetkilikti jáne júıeli túrde jumys júrgizilýde», - dep tolyqtyrdy Ajar Ǵınııat.

Buǵan deıin Ajar Ǵınııat eldegi epıdemıologııalyq jaǵdaıdy baıandap, koronavırýs shekteýleri qaıta ornaı ma degen suraqqa jaýap bergen edi.