Qyzylshaǵa qarsy vaktsına qandaı jaǵdaıda salynbaıdy – Mınıstrlik jaýaby

ASTANA. KAZINFORM – QR Densaýlyq saqtaý mınıstrligi qazaqstandyqtardyń qyzylshaǵa qarsy vaktsınalaýdan bas tartýynyń yqtımal sebepterin atady.

«Qazaqstan Respýblıkasynyń Ulttyq profılaktıkalyq egý kúntizbesine sáıkes, qyzylshaǵa qarsy josparly ımmýndaý 12-15 aı jáne 6 jas aralyǵyndaǵy balalarǵa júrgiziledi», - delingen mınıstrliktiń Kazinform agenttigi redaktsııasynyń resmı saýalyna bergen jaýabynda.

Budan basqa, qyzylsha jaǵdaılaryn tirkeýdi eskere otyryp, naýqaspen baılanysta bolǵan, buryn vaktsına almaǵan nemese qyzylshaǵa qarsy vaktsına týraly habarsyz 30 jasqa deıingi azamattardy epıdemıologııalyq kórsetkishteri boıynsha shuǵyl ımmýndaý (QR Densaýlyq saqtaý mınıstriniń 2021 jylǵy 2 aqpandaǵy №13 buıryǵy), sondaı-aq 6-10 aılyq jáne 2-4 jastaǵy balalardy qosymsha jappaı ımmýndaý júrgiziledi. Bul qatarda vaktsınalanbaǵan medıtsına qyzmetkerleri men josparly egýdi ótkizip alǵan 18 jasqa deıingi adamdar da bar.

«Osyǵan baılanysty, joǵaryda atalǵan kontıngentterge kirmeıtin adamdar qyzylshaǵa qarsy ımmýndaýǵa jatpaıdy», - deıdi Densaýlyq saqtaý mınıstrligi.
Buǵan deıin qazaqstandyqtar Kazinform agenttiginiń redaktsııasyna qyzylshaǵa qarsy vaktsınadan bas tartqandar týraly shaǵymdarmen júgingen bolatyn.