Qyzylshaǵa qarsy vaktsına basqa da juqpaly aýrýlardan qorǵaıdy - dáriger

Qyzylsha - álemdegi eń juqpaly jáne ólimge ákeletin aýrýlardyń biri. Oǵan qarsy jalǵyz jáne senimdi qural - vaktsınatsııa. Bul týraly Almatydaǵy № 36 qalalyq emhananyń dırektory Gúljaınat Tilegen aıtty, dep habarlaıdy Kazinform.

Gúljaınat Tilegenniń aıtýynsha, qyzylshamen aýyrǵandar bórtpe paıda bolǵanǵa deıin tórt kún jáne odan keıin tórt kún juqpaly bolady. Bul aýrýdyń taralýyn tejeýdi qıyndatady. Qyzylsha pnevmonııa, entsefalıt, tipti ólim sııaqty aýyr asqynýǵa ákelýi múmkin.

Vaktsınatsııa - balalardy qyzylshadan qorǵaýdyń eń tıimdi ádisi. Vaktsına qaýipsiz ári tıimdi jáne aýrýǵa qarsy uzaq merzimdi ımmýnıtetti qamtamasyz etedi.

«Balalardy qyzylshadan qorǵaý úshin olardyń vaktsınatsııalanýy óte mańyzdy, óıtkeni tek vaktsına qyzylshanyń órshý qaýpin azaıtyp, ómirdi saqtaýǵa kómektesedi. Birinshi egý 12 aılyq balalarǵa, ekinshisi olar 6 jasqa tolǵanda júrgiziledi. Qyzylshamen aýyratyn naýqastardyń kóbeıýine baılanysty Qazaqstanda qyzylsha, qyzamyq jáne parotıtke qarsy qosymsha jappaı ımmýndaý júrgizilip jatyr. Qazir bizdiń emhanada 6 aıdan 10 aı 29 kúnge deıingi balalarǵa egý júrgizilip jatyr. Kelesi aıdan (1 jeltoqsannan) bastap 2 jastan 4 jas 11 aı 29 kúnge deıingi balalar egiledi. Bul aýrý juqtyrǵan balalardyń 60%-ynyń josparly túrde ekpe almaýyna, kóp jaǵdaıda ata-analarynyń ekpeden bas tartýyna baılanysty», - deıdi dáriger.

Qalalyq qoǵamdyq densaýlyq saqtaý basqarmasynan málim etkendeı, megapolıstegi ınfektsııalyq statsıonarlar qyzylsha aýrýynyń órshýine baılanysty 90,3 paıyzǵa toldy.

Megapolıste qyzylsha juqtyrǵan 1994 balanyń 1880-i ekpe almaǵan.