Qyzylshaǵa qarsy qosymsha 1,5 mln doza vaktsına satyp alyndy – Premer-Mınıstr
Qazaqstanda qyzylsha aýrýyna qarsy qosymsha ekpe satyp alyndy. Bul týraly Úkimet basshysy Álıhan Smaıylov málim etti, dep habarlaıdy Kazinform.
«Elimizde qyzylsha aýrýynyń údeýine baılanysty qosymsha 1,5 mln doza vaktsına satyp alyndy», - dedi Álıhan Smaıylov Úkimet otyrysynda.
Úkimet basshysy túrli ınfektsııalyq aýrýlar onyń ishinde qyzylshaǵa qarsy vaktsınany aýyl halqyna jetkizýdi quzyrly organdarǵa júktedi.
«Densaýlyq saqtaý mınıstrligi ákimdiktermen birlesip, ásirese aýyldyq jerlerge jetkizý kezinde vaktsınalardy saqtaý men tasymaldaýdyń tıisti rejımin qamtamasyz etýi qajet. Bul másele boıynsha medıtsına qyzmetkerleriniń jaýapkershiligin arttyrý kerek», - deıdi ol.
Buǵan deıin Álıhan Smaıylov qyzylsha aýrýyna qatysty qazirgi jaǵdaı elimizde sońǵy 10 jylda bolmaǵanyn aıtqan edi.
