Qyzylshaǵa qarsy ekpesi joq balalar josparly emdeýge statsıonarǵa qabyldanbaıdy

PETROPAVL. KAZINFORM – Soltústik Qazaqstan oblysynda bıyl qyzylshanyń zerthanalyq rastalǵan 15 jaǵdaıy tirkeldi. Bul ótken jyldyń uqsas kezeńimen salystyrǵanda 42% tómen. 

SQO sanıtarııalyq-epıdemıologııalyq baqylaý departamentiniń málimetinshe, syrqattanǵandardyń 40% — Petropavl turǵyny, 2 jaǵdaıdan Aqjar, Mamlıýt, Ýálıhanov aýdandarynda jáne bir jaǵdaıdan Qyzyljar, Shal aqyn, Ǵ. Músirepov atyndaǵy aýdandarda tirkelgen.

Sondaı-aq qyzylsha juqtyrǵandardyń 60% — 5 jasqa deıingi balalar bolsa, jalpy aýyrǵandardyń 94% osy ınfektsııaǵa qarsy vaktsınatsııanyń tolyq kýrsy bolmaǵan.

— Epıdemıologııalyq jaǵdaıdy turaqtandyrý maqsatynda Qazaqstan Respýblıkasynyń Bas memlekettik sanıtarııalyq dárigeri Qaýlyǵa qol qoıdy. Nátıjesinde qyzylshaǵa, qyzamyqqa jáne parotıtke qarsy vaktsınatsııalaý kóbeıedi.

6 aıdan bastap 10 aı 29 kúnge deıingi balalar arasynda jaǵdaı turaqtanǵanǵa deıin qosymsha ımmýndaý júrgiziledi. Oblysta jyldyń basynan bastap osy jas tobynda 232 adamǵa vaktsına salyndy, — deıdi departament basshysy Áset Jumataev.

Budan bólek Ulttyq profılaktıkalyq egý kúntizbesine sáıkes egilmegen 2 jastan 5 jasqa deıingi jáne 7 jastan 18 jasqa deıingi 119 balaǵa vaktsına salyndy.

Ekpe alǵany týraly derekteri joq 30 jasqa deıingi densaýlyq saqtaý uıymdarynyń medıtsına qyzmetkerleri de vaktsına alyp jatyr.

— Balalardy josparly emdeýge jatqyzýǵa qoıylatyn talaptar kúsheıtildi. Endi turaqty medıtsınalyq qarsy kórsetilimderi bar balalardy qospaǵanda, qyzylshaǵa, qyzamyqqa jáne epıdemııalyq parotıtke qarsy vaktsınatsııasy joq balalar josparly túrde statsıonarlarǵa jatqyzylmaıdy.

Bilim berý uıymdaryna ujymdyq ımmýnıtetti qalyptastyrý úshin balalardyń keminde 90% ekpelermen qamtý usynyldy.

Mektepter men balabaqshalarda aýrýdyń belgilerin anyqtaý úshin «tańerteńgi súzgi» júrgizilýi kerek. Al qyzylsha anyqtalǵan jaǵdaıda ekpe almaǵan balalardy ýaqytsha shettetý kózdelgen, — deıdi Áset Jumataev.

Buǵan deıin Qostanaı oblysynda qyzylsha derti órship turǵanyn jazǵan edik.