Qyzylshaǵa baılanysty dárigerler ata-analarǵa úndeý jasady
ASTANA. KAZINFORM — 2025 jyldyń qazan aıynan bastap elordada qyzylshamen aýyratyn naýqastar sany artqan.
Astanadaǵy № 3 Kópsalaly qalalyq balalar aýrýhanasynda qyzylsha dıagnozymen aýrýhanaǵa jatqyzylǵan balalarǵa kezekti tekserý júrgizildi. Dárigerler ata-analarǵa kezekti márte balalaryna ýaqytyly vaktsına saldyrtý keregin eskertti.
Aýrýhananyń medıtsınalyq bólim jónindegi dırektor orynbasary Roza Ótegenovanyń aıtýynsha, 2025 jyldyń qazan aıynan bastap elordada qyzylshamen aýyratyn naýqastar sany artqan.
— 2025 jyldyń qazan aıynan beri qyzylsha dıagnozymen túsetin naýqastar sany kóbeıdi. Gospıtalızatsııanyń eń joǵary kórsetkishi 2025 jyldyń qarasha-jeltoqsan aılaryna sáıkes keldi. Bıylǵy qańtardan bastap tómendeý baıqalǵanymen, bul dıagnozben balalar áli de túsip jatyr, — dedi ol.
Qazirgi ýaqytta statsıonarda qyzylsha dıagnozymen 50-den astam bala em qabyldap jatyr. Olardyń basym bóligi — bes jasqa deıingi búldirshinder. Sonymen qatar mektep oqýshylary men orta jáne joǵary oqý oryndarynyń stýdentteri de bar.
Eki jasar Asylymnyń anasy Bekzada Ámirjanova qyzynyń qalaı aýyrǵanyn aıtyp berdi.
— Sársenbi kúni qyzymnyń qyzýy kóterildi. Bul qyzylsha bolýy múmkin dep oılaǵan joqpyz. Senbi kúni keshke qaraı denesine qatty bórtpe shyqqan soń jedel járdem shaqyrdyq. Dárigerler qyzylsha ekenin aıtty. Bizdi birden juqpaly aýrýlar bólimine jatqyzdy. Sol jerde qyzylshaǵa qarsy ekpe alǵan-almaǵanymyzdy surady. Ókinishke qaraı, qyzyma da, tórt jasar ulyma da ekpe saldyrǵan joqpyz. Aýrýhanaǵa túskennen keıin balalaryma ekpe saldyrtpaǵanyma qatty ókindim, — dedi ol.
Qyzylsha — vaktsına arqyly aldyn alýǵa bolatyn ınfektsııa.
— Eger bala ekpe almaǵan bolsa, ınfektsııa óte juqpaly. Qyzylsha asqynýymen qaýipti — bronhıt, ártúrli deńgeıdegi pnevmonııa, basqa aǵzalardyń zaqymdanýy bolýy múmkin. Ásirese ortalyq júıke júıesine áser etetin asqynýlar óte qaýipti, — dep túsindirdi Roza Ótegenova.
Onyń aıtýynsha, qyzylsha aýa-tamshy jolymen taraıdy jáne naýqaspen baılanys kezinde juqtyrý yqtımaldyǵy óte joǵary.
Mamannyń sózinshe, qyzylshaǵa qarsy alǵashqy ekpe balalarǵa bir jasynda salynady. Bul — qyzylsha, qyzamyq jáne parotıtke qarsy biriktirilgen vaktsına. Qazirgi epıdemıologııalyq jaǵdaıǵa baılanysty bas memlekettik sanıtarııalyq dárigerdiń alty aılyq jastan bastap balalardy qosymsha ımmýndaý týraly qaýlysy kúshinde.
— Ókinishke qaraı, mundaı erte jasta vaktsına alǵandardyń úlesi áli de tómen. Bul ata-analardyń bala densaýlyǵyna degen jaýapkershiligin arttyrý qajet ekenin kórsetedi, — dedi dáriger.
Aýrýhana mamandary ata-analardy vaktsınatsııany keıinge qaldyrmaı, balalardy qaýipti ınfektsııalardan ýaqytyly qorǵaýǵa shaqyrady.
Aıta ketelik Almatydaǵy qyzylshamen aýyrǵandardyń basym bóligi — ekpe almaǵan balalar ekenin jazǵan edik.