Qyzylsha juqtyrǵan balalardyń 83 paıyzy ekpe almaǵan – mınıstrlik

ASTANA. KAZINFORM – Jańa jyl bastalǵaly el aýmaǵynda 64 qyzylsha juqtyrý jaǵdaıy tirkeldi. Bul týraly Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Sarhat Beısenova málim etti.

- Eldegi epıdemıologııalyq jaǵdaıdy turaqtandyrýǵa 5 jasqa deıingi balalar men medıtsına qyzmetkerlerine qosymsha jappaı ımmýndaý júrgizý yqpal etti. Onyń sheńberinde qyzylshaǵa, qyzamyqqa jáne parotıtke qarsy vaktsına satyp alýǵa Úkimet rezervinen bólingen qarajat (4,6 mlrd teńge) esebinen 1,5 mln adam ekpe aldy. Bul aýrýshańdyq deńgeıin 99,2 %-ǵa tómendetýge múmkindik berdi, - dedi Sarhat Beısenova ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, jyl basynan beri 64 qyzylsha juqtyrý jaǵdaıy tirkeldi.

- Qyzylsha ekpe almaǵan balalar esebinen tirkeldi. Bul –syrqattanǵan balalar sanynyń 83%-dan astamy. Búginde júrgizilip jatqan profılaktıkalyq jáne epıdemııaǵa qarsy is-sharalardyń arqasynda elde kókjótel boıynsha epıdemıologııalyq jaǵdaı turaqtandy, ıaǵnı syrqattaný jaǵdaıy 73%-ǵa tómendeý úrdisi baıqalady. Jyl bastalǵaly kókjóteldiń 55 jaǵdaıy tirkeldi, - dep tolyqtyrdy komıtet basshysy.

Buǵan deıin habarlaǵanymyzdaı, jyl basynan beri 51 adam koronavırýs juqtyrdy.