Qyzylsha men tumaý áli tirkelip jatyr, degenmen jaǵdaı baqylaýda - mınıstrlik
ASTANA. KAZINFORM – Osy epıdemıologııalyq maýsymnyń basynan bastap (1 qyrkúıekten bastap) Qazaqstan Respýblıkasynda JRVI-diń 3 332 252 jaǵdaıy tirkeldi, bul ótken maýsymnyń uqsas kezeńine qaraǵanda 10%-ǵa tómen.
Bul týraly QR Densaýlyq saqtaý mınıstrliginiń baspasóz qyzmeti habarlady.
Baspasóz qyzmetiniń málimetterine qaraǵanda, osy kezeńde zerthanalyq rastalǵan tumaýdyń 3 018 jaǵdaıy anyqtaldy, onyń ishinde: A tumaýy vırýsy (H3N2) - 2 958 jaǵdaı, A tumaýy vırýsy (H1N1) - 53 jaǵdaı, V tumaýy vırýsy - 7 jaǵdaı.
Tumaýdyń profılaktıkasy sheńberinde 2 272 739 adamǵa vaktsına salyndy, bul halyqtyń 11,13%-yn quraıdy jáne DDU usynymdaryna sáıkes keledi.
Bilim berý uıymdaryndaǵy oqý protsesi shtattyq rejımde júzege asyrylady. Oqýshylardyń arasyndaǵy syrqattanýshylyq synyptaǵy oqýshylar sanynyń 20%-nan aspaıdy.
Densaýlyq saqtaý mınıstrligi profılaktıkalyq sharalardy saqtaý qajettiligin eske salady: qoldy únemi jýý, úı-jaılardy jeldetý, ylǵaldy tazalaý, sondaı-aq aýrýdyń belgileri bolǵan kezde adamdar kóp jınalatyn jerlerge barýdy shekteý.
Sonymen qatar, elde qyzylsha aýrýy áli tirkelip jatyr. 2025 jyldyń qarasha aıynan bastap syrqattanýshylyq ósken. Jaǵdaılar Shymkent qalasyn qospaǵanda, elimizdiń 19 óńirinde tirkelgen.
Syrqattanýshylardyń negizgi úlesi egilmegen halyqqa tıesili - jaǵdaılardyń 80%-y, bul rette balalardyń 58% - y ata-analarynyń bas tartýy saldarynan vaktsına salynbaǵan.
Vaktsınatsııalaý qyzylsha profılaktıkasynyń jalǵyz tıimdi sharasy bolyp qala beredi. Densaýlyq saqtaý mınıstrligi ata-analarǵa ulttyq kúntizbege sáıkes balalarda profılaktıkalyq egýlerdiń bolýyn tekserýdi jáne qajet bolǵan jaǵdaıda tirkelgen jeri boıynsha medıtsınalyq uıymdarǵa júginýdi usynady.
Sonymen qatar, Ońtústik-Shyǵys Azııanyń birqatar elinde Nıpah vırýsy boıynsha epıdemıologııalyq jaǵdaıdyń kúrdelenýine baılanysty QR Memlekettik shekarasy arqyly ótetin barlyq ótkizý pýnktterinde sanıtarııalyq-karantındik baqylaý kúsheıtildi.
Úndistandy qosa alǵanda, osy ınfektsııa boıynsha qolaısyz elderden kelgen azamattarǵa erekshe nazar aýdarylady. Mundaı elderdiń tizimi únemi jańartylyp otyrady.
Halyqaralyq áýejaılarda qoǵamdyq densaýlyq saqtaý salasyndaǵy tótenshe jaǵdaılarǵa den qoıý boıynsha vedomstvoaralyq oqý-jattyǵýlar ótkiziledi. Medıtsınalyq uıymdar joǵary daıyndyq rejımine aýystyryldy, dárilik zattardyń, jeke qorǵaný quraldarynyń jáne dezınfektsııalyq preparattardyń qorlary qamtamasyz etildi.
Osyǵan deıin elde 400-ge jýyq densaýlyq saqtaý sýbektisi qyzmetin toqtatqany týraly jazdyq.