Qyzylsha men parotıt asqynǵan jaǵdaıda estý qabiletine áser ete me
ASTANA. KAZINFORM – Tuzdy sýmen tamaqty shaıý qabynýdy azaıtyp, tynys alýdy jeńildetýge kómektesedi. Alaıda onyń tıimdiligi eritindiniń durys daıyndalýyna tikeleı baılanysty. Bul týraly otolarıngolog Gúlzıra Álibekqyzy Jibek joly telearnasynyń Búgin LIVE baǵdarlamasynda aıtty.
– Durys daıyndalǵan tuzdy sý tamaqtaǵy qabynýdy báseńdetip, vırýs pen bakterııalardan jınalǵan shyryshty azaıtady. Nátıjesinde tynys alý jeńildep, jóteldiń basylýyna yqpal etedi, – dedi maman.
Sondaı-aq dáriger parotıt pen qyzylshanyń joǵarǵy tynys joldarynyń juqpaly aýrýlary ekenin eske saldy. Bul dertter aýa-tamshy jolymen taraıdy. Qoǵamdyq ımmýnıtettiń jetkilikti deńgeıde qalyptaspaýynan atalǵan ınfektsııalar keńinen taralyp jatyr.
– Bul aýrýlardyń asqynýy az emes. Qyzylsha men parotıt mı qabynýyn, isinýin týdyrýy múmkin. Sonyń saldarynan júıke júıesi zaqymdalyp, estý qabileti sozylmaly túrde tómendeýi, tipti tolyq joǵalýy yqtımal, – dedi ol.
Dáriger qulaq kútimine qatysty da mańyzdy eskertýler jasady. Onyń sózinshe, kúndelikti qabyldaýǵa qulaǵyn túrli zattarmen tazalaıtyn naýqastar jıi keledi.
– Qulaqty shuqylap tazalaýdyń qajeti joq. Qulaq ózdiginen tazarady sóılegende, shaınaǵanda tómengi jaqtyń qozǵalysy arqyly tazalaný júredi. Al taıaqsha nemese sirińke qoldaný kerisinshe jaraqattap, asqynýǵa ákelýi múmkin, – dedi maman.
Onyń aıtýynsha, balalarǵa alty aıda bir ret, eresekterge jylyna bir ret profılaktıkalyq tazalaý jetkilikti. Al úı jaǵdaıynda óz betimen tazalaý usynylmaıdy.
Qulaqqap qoldaný erejelerine toqtalǵan Gúlzıra Álibekqyzy kúnine bir saǵat tyńdaǵan jaǵdaıda ár 10–15 mınýt saıyn úzilis jasaý qajettigin aıtty. Sonymen qatar dybys deńgeıin 50 paıyzdan asyrmaý kerek. Sebebi qatty dybys estý júıkesine shamadan tys qysym túsirip, estý qabiletiniń tómendeýine ákeledi.
Estý qabiletiniń jasqa baılanysty ózgerýine qatysty maman presbıakýzıs dep atalatyn fızıologııalyq úderis ádette 60 jastan keıin bastalatynyn atap ótti.
– Bul kezde eki qulaqta birdeı estýdiń tómendeýi baıqalady. Alaıda arterııalyq qysym, qant dıabeti sekildi sozylmaly aýrýlary bar adamdarda bul ózgerister erterek damýy múmkin, – dep túıindedi ol.
Buǵan deıin asqazan aýrýlary tuqym qýalaıtynyn jazǵanbyz.