Qyzylsha qaıta órshidi: Sanıtarııalyq baqylaý komıteti ata-analarǵa úndaý jasady
ASTANA. KAZINFORM – Densaýlyq saqtaý mınıstrligi Sanıtarlyq-epıdemıologııalyq baqylaý komıteti eldegi qyzylsha boıynsha qalyptasqan epıdemıologııalyq jaǵdaıǵa baılanysty úndeý jasady.
- 2025 jyldyń qorytyndysy boıynsha qyzylshaǵa shaldyǵý deńgeıi aldyndaǵy jylmen salystyrǵana 85%-ǵa tómendedi. Soǵan qaramastan ótken jyldyń qarasha aıynan bastap aýrýdyń taraýy qaıta óse bastaǵany baıqalyp otyr.
Alańdatarlyq jaıt – naýqastardyń basym bóligin ekpe almaǵan balalar quraıdy. Aýrýǵa shaldyqqandardyń 79%-y qyzylshaǵa qarsy múlde vaktsına almaǵan, al 8%-dan astamy vaktsınatsııanyń tolyq kýrsyn ótpegen.
Syrqattanǵan balalardyń 59%-y ata-analardyń vaktsınatsııadan bas tartýyna baılanysty egilmegen, - delingen habarlamada.
Sondaı-aq onda sanıtarııalyq-epıdemıologııalyq qyzmet barlyq qajetti profılaktıkalyq jáne indetke qarsy is-sharalardy qabyldap jatqany aıtylǵan. Alaıda epıdemıologııalyq jaǵdaıdy tolyq turaqtandyrý ázirge múmkin bolmaı otyr. Qazirgi tańda ınfektsııanyń taralýynyń negizgi sebebi ata-analardyń balalaryn vaktsınatsııalaýdan bas tartýy bolyp otyr.
Tek 2025 jyldyń ózinde profılaktıkalyq egýlerden 19 myńnan astam adam bas tartqan. Bul ujymdyq ımmýnıtettiń tómendeýine jáne qyzylsha boıynsha jaǵdaıdyń nasharlaýyna ákeldi.
- Qurmetti ata-analar, este saqtańyzdar: qyzylsha – eń juqpaly vırýstyq aýrýlardyń biri. Egilmegen jaǵdaıda ol pnevmonııaǵa, júıke júıesiniń zaqymdalýyna, múgedektikke, tipti ólimge deıin alyp kelýi múmkin. Qorǵanýdyń jalǵyz senimdi joly – vaktsınatsııa. Qyzylshaǵa qarsy ekpe jaqsy qabyldanady, uzaq merzimdi ımmýnıtet qalyptastyrady jáne ınfektsııanyń ózinen de, onyń aýyr saldarlarynan da tıimdi qorǵaıdy. Balalaryńyzdyń densaýlyǵy men bolashaǵy – óz qoldaryńyzda. Olardy senimdi qorǵanystan aıyrmańyzdar. Vaktsınatsııa – tek óz balańyzdyń ǵana emes, aınalańyzdaǵy adamdardyń densaýlyǵy úshin de jaýapkershilik, - deıdi mamandar.
Osyǵan deıin densaýlyq saqtaý mınıstrligi qyzylsha órship turǵan óńirlerdi ataǵan bolatyn.