Qyzylsha «qarapaıym ınfektsııa» emes: Mınıstr ata-analarǵa úndeý jasady
ASTANA. KAZINFORM — Densaýlyq saqtaý mınıstri Aqmaral Álnazarova qyzylsha dendep turǵan kezeńde vaktsınatsııanyń qaýipsizdigi men tıimdiligin atap, ata-analardy balalaryn qorǵaýǵa shaqyrdy.
Mınıstr qyzylsha pnevmonııaǵa, nerv júıesiniń zaqymdanýyna jáne basqa da kúrdeli saldarǵa ákelýi múmkin ekenin eskertti.
— Ana retinde de, dáriger retinde de men árbir ata-ana úshin eń basty qundylyq — balasynyń qaýipsizdigi ekenin jaqsy bilemin. Búginde elimizde qyzylsha aýrýynyń ósýi tirkelýde. Bul «qarapaıym balalar ınfektsııasy» emes. Qyzylsha — asqynýy aýyr bolýy múmkin qaýipti juqpaly aýrýlardyń biri. Ol pnevmonııaǵa, nerv júıesiniń zaqymdanýyna jáne basqa da kúrdeli saldarǵa ákelýi múmkin. Ásirese erte jastaǵy balalar osal keledi, — dedi ol Instagram paraqshasyna salǵan úndeýinde.
Qazaqstan Respýblıkasy Densaýlyq saqtaý mınıstrliginiń tarapynan birqatar shara qabyldandy. Vedomstvo basshysy balaǵa ekpe jasatý arqyly tek óz balańyzdy ǵana emes, ózge balalardy da qorǵaýǵa bolatynyn alǵa tartty.
— 6–10 aılyq balalarǵa qosymsha ımmýndaý bastaldy, ekpeni ótkizip alǵan balalardy vaktsınatsııalaý uıymdastyryldy, profılaktıkalyq jumys kúsheıtildi. Qazirgi tańda syrqattanýshylyqtyń ósý qarqynynyń tómendeýi baıqalady, degenmen jaǵdaı barshamyzdyń ortaq jaýapkershiligimizdi talap etedi. Senimdi qorǵanýdyń jalǵyz joly — vaktsınatsııalaý. Onyń qaýipsizdigi men tıimdiligi kópjyldyq tájirıbemen dáleldengen. Sizderdi dáleldi medıtsına qaǵıdattaryna jáne mamandardyń usynymdaryna súıenýge shaqyramyn. Balańyzǵa ekpe jasatý arqyly siz tek óz balańyzdy ǵana emes, ózge balalardy da qorǵaısyz. Balalaryńyzdyń densaýlyǵyna qamqorlyq jasańyzdar. Ekpeni ýaqytyly alyńyzdar, — dedi Álnazarova.
Osydan buryn Almatyda bıyl 600-ge jýyq adam qyzylsha juqtyrǵany belgili boldy.
