Qyzylordanyń jol qurylysynda qandaı kemshilikter jıi kezdesedi

QYZYLORDA. KAZINFORM — Qyzylordanyń jol qurylysy salasynda asfalt-beton qalyńdyǵynyń jetispeýi, aınalma joldy durys kútip-ustamaý sııaqty kemshilikter jıi kezdesedi.

«Jol aktıvteri sapasynyń ulttyq ortalyǵy» RMK Qyzylorda oblysy boıynsha fılıaly ótken jyly 5 nysannan 1760 synama alǵan. Sonyń 132-si nemese 7,5%-y normatıvke sáıkes kelgen joq. 115 kemshilik qalpyna keltirildi. Al aspaptyq tekserý barysynda 7 aqaý anyqtaldy. Tapsyrys berýshiler men merdigerlerge kemshilikti joıý jóninde eskertilgen.

— Eskertý nátıjesinde 6 lot boıynsha jalpy somasy quny 40 mln teńgege jýyqtaıtyn joldyń 414 sharshy metr asfalt-beton jamylǵysy, 14 352 sharshy metr basty qabaty aýystyryldy. Synama júrgizý kezinde anyqtalǵan negizgi kemshilikter — asfalt-beton jol qalyńdyǵynyń jetispeýi, aınalma jolǵa durys kútim jasamaý. Búgingi kúni merdiger mekemeler — Qytaı azamattyq ınjenerlik-qurylys, Gýıchjoý jol-ınjenerlik korporatsııalary asfalt jabyndysyn talapqa saı qaıta salyp jatyr. Mundaı kemshilikti jergilikti «Qyran» seriktestigi dereý qalpyna keltirdi, — dedi oblystyq fılıaldyń bólim basshysy Erjan Ýsmanov.

Mekeme ókilderi jyl basynan beri 61 synama alsa, sonyń 2-i normatıvke sáıkes kelmegen. Búgingi kúni osy jáne aspaptyq tekserý barysynda anyqtalǵan aqaýlar da jóndeldi.

Ótken jyly Qyzylorda oblysynda jol qurylysyna nemquraıly qaraǵan eki tehnıkalyq qadaǵalaýshy lıtsenzııasynan aıyryldy.