Qyzylordanyń jylý maýsymyna daıyndyǵy qalaı
QYZYLORDA. KAZINFORM — Qyzylorda oblysyndaǵy jylýmen qamtý nysandaryn jańǵyrtý úshin bıyl 13,5 mlrd teńge bólindi. Bul týraly oblystyq energetıka jáne turǵyn úı-kommýnaldyq sharýashylyq basqarmasy habarlady.
Onyń ishinde Qyzylorda jylý elektr ortalyǵyndaǵy 3 bý qazandyǵyn jańǵyrtý jumysyn aıaqtaýǵa Úkimet rezervinen 2,5 mlrd teńge, jergilikti bıýdjetten 1,3 mlrd teńge baǵyttaldy.
— Búgingi kúni qurylys qyzý. Bý qazandyqtary aldaǵy jylý berý maýsymyna daıyn bolady. Jergilikti bıýdjet pen kásiporyn qarjysy esebinen 1 generator, 1 kúshtik transformatordy jańǵyrtý, 10 bý qazandyǵy, 21 avtonomdy qazandyq jóndeledi. Jumystyń 66%-y oryndaldy — delingen habarlamada.
Sondaı-aq 7,4 mlrd teńge qarjy esebinen 8,7 shaqyrym jylý jelileri jańǵyrtylady. Nátıjesinde jylý jelileriniń tozý deńgeıi 42%-dan 40%-ǵa tómendeıdi.
— Oblys aýmaǵynda 1 079 áleýmettik nysan bar. Onyń ishinde 6 mektep, 9 medıtsınalyq nysan tolyq jóndeledi. Kezekti jylý berý maýsymyna 139,3 myń tonna kómir qajet. Qazirgi kezde qala jáne aýdan ákimdikteriniń operatorlarmen kelisimine sáıkes kómir keste boıynsha jetkizilip jatyr, — delingen habarlamada.
Basqarma ókilderi jylý maýsymyna ázirlik turaqty baqylaýda ekenin atap ótti.
Al keshe Energetıka vıtse-mınıstri Suńǵat Esimhanov el aýmaǵyndaǵy jylý maýsymyna daıyndyq jumysy týraly aıtyp berdi.