Qyzylordanyń jańa gaz elektr stantsııasy táýlik boıy energııa óndire bastady
ASTANA.KAZINFORM - Qyzylordadaǵy qýaty 240 MVt jáne jylý energııasyn óndirý kólemi 277 Gkal bolatyn jańa bý-gaz qondyrǵysynda (BGQ) iske qosý-retteý jumystarynyń belsendi kezeńi júrip jatyr, dep habarlaıy QR Energetıka mınıstrliginiń baspasóz qyzmeti.
Túrkııalyq «Aksa Energy» kompanııasynyń tikeleı jeke ınvestıtsııalary esebinen iske asyrylyp jatqan joba aımaqtyń elektr jáne jylý energııasyna degen qajettiligin tolyq óteýge baǵyttalǵan.
Qazirgi ýaqytta eki gaz týrbınaly qondyrǵy táýlik boıy jumys istep, birtutas energııa júıesine 170 MVt qýat berip otyr jáne elimizdiń ońtústik aımaǵy úshin qosymsha generatsııany qamtamasyz etip jatyr.
Jaqyn arada taǵy bir bý týrbınasyn paıdalanýǵa berý josparlanǵan, bul stantsııany jobalyq kórsetkishterge shyǵarýǵa múmkindik beredi.
Qyzylorda BGQ-syn iske asyrý – Energetıka mınıstrliginiń Qazaqstannyń energetıkalyq negizin jańartý jónindegi aýqymdy josparynyń bir bóligi. Bıyl respýblıkada dástúrli jáne jańartylatyn energııanyń rekordtyq 2,64 GVt qýatyn paıdalanýǵa berý josparlanyp otyr.
Jyldyq josparǵa tórt bý-gaz qondyrǵysyn, eki jel jáne tórt kún elektr stantsııasyn iske qosý, sondaı-aq eki nysannyń qýatyn keńeıtý jumystary engizilgen.
-Jańa energııa nysandary jylyna shamamen 16 mlrd kVt*saǵ elektr energııasyn óndiredi dep kútilip otyr. Bul sharalar 2027 jyldyń birinshi toqsanynyń sońyna qaraı eldegi energııa tapshylyǵyn tolyq joıýǵa, al 2029 jylǵa qaraı qýattardyń turaqty profıtsıtin qamtamasyz etýge múmkindik beredi,-delingen habarlamada.
Osyǵan deıin energetıka salasyndaǵy memlekettik satyp alýda otandyq ónimniń kólemi artyp kele jatqany týraly jazdyq.
