Qyzylordanyń jańa áýejaıynda suranys azaıyp, birneshe reıs jabylǵan
ASTANA. KAZINFORM – Qyzylorda oblysynyń ákimi Nurlybek Nálibaev Qorqyt Ata áýejaıynyń jańa termınaly qalaı jumys istep turǵanyn, onyń vetnamdyq kompanııa basqarýyna nege berilmegenin aıtyp berdi.
Ákimniń aıtýynsha, áýejaıdyń qurylysyna 21 mlrd teńge qarajat ketti. Onyń 16 mlrd teńgesin ınvestorlar salsa, ınfraqurylymyn qamtamasyz etýge oblys bıýdjetinen 4 mlrd qarajat bólingen.
– Áýejaıǵa memleketten eshqandaı sýbsıdııa berilmeıdi. Tabysy az bolsa da, ózin-ózi aqtap otyr. Óıtkeni bizde reıster az. Qazirgi tańda aptasyna 29 reıs bar, negizinen Almaty, Astana qalalaryna reıster qatynaıdy. Biz shymkenttik «ıÝjnoe nebo» kompanııasymen birlesip, Shymkent, Aqtóbe, Oral qalalaryna da reıster ashqanbyz. Biraq suranystyń bolmaýyna baılanysty olar toqtatyldy. Munyń barlyǵy suranysqa baılanysty, - dedi Nurlybek Nálibaev Ortalyq kommýnıkatsııalar qyzmetinde.
Oblys basshysy jańa termınaldyń jylyna 2 mln jolaýshy qabyldap, qyzmet kórsete alatynyn atap ótti. Astana men Almatydan basqa qalalarǵa suranys azdaý bolyp tur.
Sonymen birge, buǵan deıin Qorqyt ata áýejaıy vetnamdyq kompanııaǵa berilýi múmkin ekeni habarlanǵan edi. Oblys ákimi vetnamdyq kompanııa usynystary tıimsiz bolǵandyqtan, kelisim ornamaǵanyn aıtty.
– Biz Vetnamnyń SOVICO Group kompanııasymen jumys istedik. Shynyn aıtqanda, olardyń usynystary bizge unaǵan joq. Biz óz usynysymyzdy aıttyq, olar óz usynysyn aıtty. Bizdiń áýejaıdyń eshkimge bir tıyn qaryzy joq, ózin-ózi aqtap otyr. Az bolsa da, aıyna 5 mln teńge paıda taýyp otyr. Memleketten eshqandaı sýbsıdııa berilmeıdi. Ol kisiler (Vetnam kompanııasy) alǵashqy kezde qosymsha sýbsıdııa bólýdi surady. Tıimsiz bolǵandyqtan, kelisken joqpyz. Qazir basqa da ınvestorlardy qarastyryp jatyrmyz. Ol birinshi memleket úshin tıimdi bolýy kerek. Ózi qaryzsyz jumys istep turǵan áýejaıdy sýbsıdııamen basqa kompanııaǵa qalaı beremiz, ol tıimsiz, - dedi Nurlybek Nálibaev.
Buǵan deıin obyls ákimi qyzylordalyq dárigerlerdiń Eýropa elderinde biliktiligin arttyrǵanyn aıtqan edi. Sońǵy úsh jylda óńirdiń densaýlyq saqtaý salasyna 441 mlrd teńge bólingen.