Qyzylordanyń túzeý mekemesinde 21 kásipker 600-deı jazasyn óteýshini jumyspen qamtyp otyr
QYZYLORDA. KAZINFORM — Qyzylorda oblystyq qylmystyq atqarý júıesi departamentine qarasty № 60 mekemeniń óndiristik aımaǵynda 21 kásipker óz isin damytyp, 600-deı sottalǵan adamdy jumyspen qamtyp otyr.
Departamenttiń baspasóz qyzmeti habarlaǵandaı, sottalǵandardyń qolynan shyqqan ónimder oblys aýmaǵyna ǵana emes, elimizdiń ózge óńirlerine de jóneltiledi.
— Búginde olar dánekerleý tsehynda sý bógetterine arnalǵan, sý aǵynyn retteıtin shlıýz qurylǵylaryn jasap jatyr. Temir buıymdar óndiretin jeke kásipkerdiń óndirisinde 90-ǵa jýyq adam eńbek etedi. Byltyr alǵash ret 5-6 metrlik shlıýzder qurastyrsa, bıyl suranys artyp, 400-ge deıin 2-3 metrlik shlıýz óndirip jatyr, — delingen habarlamada.
Jazasyn óteýshiler sonymen qatar mekeme aýmaǵyna arnalǵan temir qorshaý jáne jáshik, mobıldi keńse, mal bordaqylaýǵa arnalǵan jyljymaly qora, temir astaý, terbelmeli oryndyqtar jasaıdy.
Jeke kásipker Orynbasar Bodyqov sottalǵan azamattarǵa kásiptiń qyr-syryn úıretý úshin arnaıy mamandar tartqanyn aıtty.
— Ónimniń alǵashqy legi Jambyl oblysyna jiberildi. Qazirgi kezde Almaty oblysynan da tapsyrys túsip jatyr. Bir aı ishinde 100-den astam shlıýz qurastyramyz, — dedi ol.
Eske salaıyq, Qyzylorda oblysynda ótken jyly 70-ke jýyq jazasyn óteýshi otbasyn qurdy.
