Qyzylordanyń sý aıdyndarynan 80-ge jýyq zańsyz aý qaldyǵy tabyldy
QYZYLORDA. KAZINFORM — Aral-Syrdarııa oblysaralyq basseındik balyq sharýashylyǵy ısnpektsııasy Qyzylorda oblysynda ótken «Taza sý aıdyndary» jáne «Ýyldyryq-2026» aktsııalarynyń qorytyndysyn jarııalady.
«Taza sý aıdyndary» atty respýblıkalyq tabıǵat qorǵaý aktsııasy balyq resýrsyn saqtaý, sý aıdyndarynyń ekologııalyq jaǵdaıyn jaqsartý jáne tabıǵat paıdalaný zańnamasynyń saqtalýyn qamtamasyz etýge baǵyttaldy.
— Aktsııa aıasynda sý aıdyndarynan 10 tonnadan astam turmystyq qaldyq shyǵaryldy. Balyq qoryna aıtarlyqtaı qaýip tóndiretin 78 zańsyz aý qaldyǵy anyqtalyp, joıyldy. Keshendi jumys sý ekojúıesin saýyqtyrýǵa jáne balyqtyń tabıǵı mekendeý ortasyn saqtaýǵa múmkindik berdi, — dedi ınspektsııa basshysynyń orynbasary Janqoja Saparov.
Al «Ýyldyryq-2026» is-sharasy sý aıdyndaryn tazartý, zańsyz balyq aýlaýdyń aldyn alý jáne balyqtyń tabıǵı kóbeıýine qolaıly jaǵdaı jasaý maqsatynda uıymdastyryldy.
— Sý aıdyndarynda balyqtyń ýyldyryq shashý kezeńinde qorǵaý sharalary kúsheıdi. Nátıjesinde zańsyz balyq aýlaýdyń ondaǵan deregi anyqtalyp, ákimshilik hattamalar toltyryldy. Birqatary sotqa joldandy. Quqyq qorǵaý organdarynyń óndirisinde qylmystyq sıpattaǵy ister qaralyp jatyr. Zań buzýshylardan júzdegen keli zańsyz aýlanǵan balyq pen ondaǵan balyq aýlaý quraly tárkilenip, tabıǵatqa keltirilgen zalaldy óteý baǵytynda jumystar júrgizildi, — dedi Janqoja Saparov.
Buǵan deıin Atyraý, Mańǵystaý jáne BQO-da eki aıǵa sozylǵan «Bekire-2026» aktsııasynyń nátıjesinde 1 239 quqyqbuzýshylyq anyqtaldy.
