Qyzylordanyń sol jaǵalaýynda sý qysymy qashan kóteriledi
QYZYLORDA. KAZINFORM – Qyzylorda qalasynyń sol jaǵalaý bóligindegi kópqabatty turǵyn úılerdiń joǵarǵy jaǵyna sý jetpeıtini týraly shaǵym jıi kezdesedi. «Qyzylorda sý júıesi» kásipornynyń ókilderi Kazinform tilshisine bergen suhbatta bul máseleniń ýaqytsha ekenin jetkizdi.
Kásiporynǵa qarasty «Araı» sý alý qurylymy qalanyń «Araı» shaǵyn aýdany men sol jaǵalaý halqyn tirshilik nárimen qamtyp otyr. Bıyl munda 5 eksplýatatsııalyq barlaý uńǵymasyn burǵylaýǵa bıýdjet qarajaty esebinen 420,5 mln teńge qarjy bólindi. Búginde jumys aıaqtalýǵa jaqyn.
– Bul jerde 13 uńǵyma bar. Josparlanǵan 5 uńǵymanyń 4-eýin burǵylaý aıaqtaldy. Bul jumystardyń nátıjesi «Araı» shaǵyn aýdany men sol jaǵalaý halqyn tolyq kólemde sýmen qamtamasyz etýge múmkindik beredi. Sol jaǵalaýda halyq sany ósip keledi. Sondyqtan kópqabatty úılerdiń joǵarǵy qabatyna baratyn sýdyń qysymyn arttyrýǵa da septigin tıgizedi, - dedi «Qyzylorda sý júıesi» MKK «Araı» sý alý qurylymynyń ýchaske basshysy Júnis Aıtilesov.
Jýyrda Májilis depýtaty Naýryz Saılaýbaı Úkimetke saýal joldap, aýyldardy aýyzsýmen qamtamasyz etý kórsetkishteri týraly resmı derekterdiń shyndyqpen sáıkespeıtinin synaǵan bolatyn.