Qyzylordanyń Shıeli aýdanynda juqpaly aýrýlar bólimshesi jumysyn bastady
QYZYLORDA. KAZINFORM — Oblys ákimi Nurlybek Nálibaevtyń qatysýymen QR Konstıtýtsııa kúnine oraı Shıeli aýdanynda 30 tósektik juqpaly aýrýlar bólimshesi ǵımaratynyń ashylý rásimi ótti, dep habarlaıdy oblys ákiminiń baspasóz qyzmeti.
Jıynǵa Parlament Senaty men Májilisiniń depýtattary Naýryzbaı Baıqadamov, Rýslan Rústemov, Murat Ábenov, Murat Ergeshbaev, oblys prokýrory Rızabek Ojarov jáne zııaly qaýym ókilderi qatysty.
Aımaq basshysy jańa nysannyń aýdan jurtshylyǵyna sapaly medıtsınalyq kómek kórsetýdegi jetekshi bólimshege aınalýyna tilektestigin bildirdi.
— Barshańyzdy elimiz úshin aıtýly mereke aldaǵy Konstıtýtsııa kúnimen quttyqtaımyn!
Sońǵy úsh jylda oblystyń densaýlyq saqtaý salasyna 441 mlrd 700 mln teńge qarjy bólinip, halyqtyń suranysyna sáıkes túıtkildi máseleler sheshimin taýyp keledi. Prezıdentimizdiń bastamasymen qolǵa alynǵan «Aýylda densaýlyq saqtaýdy jańǵyrtý» ulttyq jobasy aıasynda barlyq aýdanda 28 medıtsınalyq nysan salyndy. Onyń 8-i Shıeli aýdanynda. Salany damytýǵa bıýdjetten tys resýrstar da tartylǵan. Biz «Qazaqstan halqyna» qoǵamdyq qorymen turaqty áriptestik baılanystamyz. Qor sońǵy eki jylda óńirdiń densaýlyq saqtaý salasyna 5 mlrd teńgege jýyq qarjy baǵyttady. Bul qarjyǵa sırek kezdesetin dertke shaldyqqan jerlesterimizge qajetti dári-dármek satyp alyndy. Oblystyq onkologııa ortalyǵyna quny 1 mlrd 100 mln teńge turatyn, respýblıka boıynsha 3 oblysta ǵana bar skrınıng júrgizýge arnalǵan jyljymaly medıtsınalyq keshen tabystady. Keshen búginde shalǵaı eldi mekenderdegi turǵyndarǵa úzdiksiz qyzmet etedi, — dedi ákim.
Nurlybek Nálibaevtiń sózinshe, paıdalanylmaı bos turǵan ǵımarattardy qaıta jańǵyrtyp, densaýlyq saqtaý salasynyń qajettiligine tıimdi paıdalanýǵa baǵyttalǵan jumys qarqyndy júrgizilip jatyr.
— Byltyr Jańaqorǵan aýdanynda bos turǵan burynǵy aýdandyq aýrýhana ǵımaraty qaıta jańǵyrtylyp, «Qamqorlyq» balalardy ońaltý ortalyǵy ashyldy. Buǵan jergilikti bıýdjetten 378 mln teńge jumsaldy. Kúni keshe dál osyndaı ortalyq Aral aýdanynda da jumysyn bastady. Bul maqsatqa oblystyq bıýdjetten 338 mln 800 myń teńge bólinip, ǵımarat qaıta jańǵyrtyldy. Qor qajetti zamanaýı qural-jabdyqtarǵa 350 mln teńge bóldi. Ortalyqta jylyna 600-ge jýyq balany ońaltýǵa múmkindik bar. Osyndaı ıgi istiń jalǵasy retinde quny 2 mlrd 323 mln teńge bolatyn 30 tósektik juqpaly aýrýlar bólimshesiniń jańa ǵımaratyn saltanatty túrde ashýǵa bas qostyq. Qazir aýdandyq aýrýhana janynan 733 mln teńgege qosymsha ǵımarat salynyp, onda 650 mln teńgeniń jańa MRT apparaty ornatylýda.
Shıeli kentindegi «Bolashaq» dárigerlik ambýlatorııasy kúrdeli jóndeýden ótti.
Zamanaýı talaptarǵa saı jabdyqtalǵan bul nysandar turǵyndarǵa sapaly medıtsınalyq kómek kórsetýge, halyqtyń turmys sapasyn arttyrýǵa zor múmkindik beredi. Aldaǵy ýaqytta halyq densaýlyǵyn jaqsartýǵa baǵyttalǵan jobalardy qoldaý, medıtsına salasyndaǵy eń mańyzdy máselelerdi sheshý jalǵasyn taba bermek, — dedi N.Nálibaev.
Rásimde Naýryzbaı Baıqadamov, Murat Ergeshbaev, Rızabek Ojarov sóz sóılep, aýdannyń áleýmettik-ekonomıkalyq damýyna úles qosqan azamattar men qurylysshylar aımaqtyń Qyzylorda oblysynyń Qurmet gramotasymen jáne oblys ákiminiń Alǵys hatymen marapattaldy. Densaýlyq saqtaý salasynyń ardageri, Shıeli aýdanynyń qurmetti azamaty Ybyraı Ahmetov bata berdi.
Jumys sapary kezinde aımaq basshysy aýdandyq aýrýhananyń qosymsha ǵımaratyna, kúrdeli jóndeýden ótken «Bolashaq» dárigerlik ambýlatorııasyna bardy. Aýdandyq aýrýhananyń 2 qabatty ǵımaratynyń qurylysy ótken jyldyń qyrkúıek aıynda bastalyp, bıyl shildede paıdalanýǵa berildi. Al ambýlatorııanyń kúrdeli jóndeý jumystary 3 aı júrgizildi.
Eske salaıyq, oblys ortalyǵynda emhanasy men onkologııalyq bólimshesi bar 300 oryndyq kópbeıindi aýrýhana qurylysy qarqyndy júrgizilip jatyr.
Jyl basynda Jańaqorǵan aýdany Tómenaryq aýylynda dárigerlik ambýlatorııasymen qosa 15 tósektik aýyldyq aýrýhana, Aral aýdany Sekseýil kentinde 40 tósek-orynǵa arnalǵan aýrýhana paıdalanýǵa berildi.
«Aýyl — el besigi» baǵdarlamasymen Qyzylorda qalasynyń Baımurat batyr eldi mekeninde dárigerlik ambýlatorııa, Dosan eldi mekeninde medıtsınalyq beket el ıgiligine tabystaldy.
Osylaısha aýyldardaǵy medıtsınalyq- sanıtarııalyq alǵashqy kómek kórsetý uıymdary ǵımarattaryn normatıvke sáıkes etip salý máselesi tolyǵymen sheshildi.
Qaıtarylǵan aktıvter esebinen 7 mlrd teńgege 4 aýdandaǵy ortalyq aýrýhanalar janynan jańa ǵımarattar salynýda.
Ana men bala ómirin qorǵaý maqsatynda kópbeıindi oblystyq aýrýhana bazasynda jańa MRT apparaty iske qosylyp, 70 oryndyq perınataldyq bólim ashyldy.
Ótken jyldan beri 17 medıtsınalyq nysan kúrdeli jóndeýden ótkizilip, 44 ǵımarattyń jylý júıesi gazǵa aýystyryldy. Bıyl da medıtsınalyq qural-jabdyqtar satyp alynady. Bul jumystyń jyl saıyn júrgizilgeniniń arqasynda jabdyqtalý deńgeıi 2022 jyly 83,2 paıyz bolsa, búginde bul kórsetkish 87,4 paıyzǵa artty.
Jergilikti bıýdjetten 225 jańa sanıtarlyq avtokólik bir mezette alynyp, eldi mekenderdegi barlyq densaýlyq saqtaý uıymyna tabystaldy. Osylaısha sanıtarlyq avtokólikpen qamtý máselesi tolyq sheshimin tapty.