Qyzylordanyń munaı kompanııalarynda 320 jumysshynyń quqyǵy qorǵaldy
QYZYLORDA. KAZINFORM – Qyzylorda oblysynda 94,5 myńǵa jýyq adam salalyq kásipodaqtardyń bastaýysh uıymdaryna tartylǵan. Bul – jergilikti jumysshylardyń 30%-yna jýyq.
Qyzylorda oblysynyń kásipodaq ortalyǵynyń tóraǵasy Maqsut Nálibaevtyń aıtýynsha, ortalyq jumysynyń negizgi tetikteriniń biri – áleýmettik áriptestik.
- Kásipodaqtyń qýaty tek músheler sanymen ólshenbeıdi. Eń bastysy, olardyń múddesin qanshalyqty qorǵap, eńbek ujymdarynyń máselelerin tıisti deńgeıde kóterip, olardyń sheshilýine yqpal ete alýymyzda. Jergilikti atqarýshy bılik, jumys berýshiler jáne kásipodaqtar oblystyq úshjaqty komıssııa aıasynda eńbek quqyǵy, jalaqy, eńbek jaǵdaılary, óndiristik qaýipsizdik, áleýmettik kepildikter men eńbek daýlarynyń aldyn alý máselelerin qaraıdy. Osy oraıda 52 iri jáne orta kásiporynmen eńbek máseleleri boıynsha ózara túsinistik jáne yntymaqtastyq týraly memorandým jasalǵan. Memorandým aıasynda eńbek jaǵdaılaryna turaqty monıtorıng júrgiziledi. Zań klınıkasyna esepti kezeńde 220 ótinish tústi. Árbir ótinish boıynsha quqyqtyq keńes berýmen shektelmeı, qajet bolǵan jaǵdaıda jumysshy quqyǵyn qalpyna keltirýge baǵyttalǵan keshendi quqyqtyq súıemeldeý qamtamasyz etiledi.
Máselen, kásipodaqtyń quqyqtyq qoldaýy nátıjesinde iri munaı kompanııasyndaǵy 320 adamnyń eńbek quqyǵy qorǵalyp, ujymdyq shartta kózdelgen jalaqyny ındeksteý máselesi oń sheshimin tapty, - dedi ol.
Zań klınıkasynyń aralasýymen 59 jumysshyǵa tıesili tólemder tolyq kólemde tólendi.
Buǵan deıin biz 2026 jyldyń alǵashqy alty aıynda memlekettik eńbek ınspektorlarynyń jumysynyń nátıjesinde Qazaqstanda 36 myńǵa jýyq jumyskerdiń eńbek quqyqtary qorǵalǵanyn jazdyq.
