Qyzylordanyń lıftileri talapqa saı ma
QYZYLORDA. KAZINFORM – Qyzylorda qalasyndaǵy lıftilerdiń jaǵdaıy qalaı? Lıft toqtap, ishinde adam qalyp qoıǵan jaǵdaılar qanshalyqty kezdesedi? Mundaıda ne isteý kerek? Kazinform tilshisi osy másele boıynsha izdenip kórdi.
Qyzylorda qalalyq turǵyn úı ınspektsııasynyń málimetine súıensek, oblys ortalyǵyndaǵy densaýlyq saqtaý, kásipkerlik nysandarynda, áleýmettik jáne bıýdjettik mekemelerde, sondaı-aq kópqabatty turǵyn úılerde barlyǵy 171 lıft qondyrǵysy men 10 eskalator ornatylǵan.
– Paıdalaný merzimi ótken jáne tozyǵy jetken lıftiler kezeń-kezeńimen aýystyrýdy qajet etedi. Qazirgi ýaqytta kópqabatty turǵyn úılerdegi 2 lıft apatty jaǵdaıda dep tanylyp, olardy jańartý máselesi jergilikti atqarýshy organdardyń baqylaýyna alynǵan, - dedi ınspektsııa basshysy Abzal Rysbek.
Biz qaladaǵy lıft qoıylǵan kópqabatty úılerdi aralap, sondaǵy turǵyndarmen tildestik. Sondaı úılerdiń birinde uzaq jyldan beri turatyn Aıman Qajyǵalıeva lıft qyzmetiniń sapasyna kóńili tolatynyn jetkizdi. Al qalanyń basqa bóligindegi turǵyndar lıftige qatysty problema baryn jasyrmady.
– Munda 2019 jyldan beri turamyn. Lıftiniń ara-tura toqtap qalyp, qıyndyq týdyratyny bar. Keıbir kórshilerimiz sondaı jaǵdaıǵa tap bolyp, qutqarýshylardy kómekke shaqyrǵan. Lıft istemeı qalǵanda baspaldaqpen kóterilýge týra keledi. Bul biz sııaqty qarttar úshin ońaı emes, - deıdi Raqymjan Janasbaev.
Qyzylorda oblystyq tótenshe jaǵdaılar departamentiniń mamandary lıft ishinde adamdardyń qalyp qoıý faktileri negizinen kópqabatty turǵyn úılerde kezdesetinin jetkizdi.
– Jyl basynan beri bizdiń mamandar osyndaı shaqyrtýǵa 8 ret baryp, 11 adam qutqardy, onyń ekeýi – bala. Al ótken jyly lıftide qalǵan adamdardyń shaqyrýymen 1 ret qutqarý jumysyna barǵanbyz, - dedi departamenttiń jedel qutqarý jasaǵy basshysynyń orynbasary Mırambek Dospenbetov.
Sala ókili lıft ishinde qalǵan jaǵdaıda qandaı áreket jasaý keregin de qaperge saldy.
– Eń aldymen sasqalaqtamaı, qorqynyshqa jol bermeı, lıft ishindegi dabyl tetigin basý kerek. Lıft ishinde tehnıkalyq qyzmet kórsetetin mamannyń telefon nómiri jazylyp turmasa, uıaly telefon arqyly 112-ge habarlasyp, departamenttiń jedel kezekshisine jaǵdaıdy naqty habarlap aıtý kerek, - deıdi ol.
Qalalyq turǵyn úı ınspektsııasy qyzmet kórsetýshi uıymdardyń tehnıkalyq qyzmet kórsetý merzimin saqtaý, lıftilerdi josparly tekserý jumystaryn kúsheıtý, tozyǵy jetken lıftilerdi kezeń-kezeńimen almastyrý baǵytynda is-sharalar qabyldaǵanyn málimdedi.
– Lıftilerdiń kúndelikti tehnıkalyq kútimimen, aǵymdaǵy jóndeý jumystarymen turǵyndardyń abonenttik tólemine sáıkes qyzmet kórsetýshi kompanııalar aınalysady. Turǵyndardyń qaltasyna salmaq túspeıdi. Al lıftilerdi tolyq aýystyrý nemese kúrdeli jóndeý shyǵyndary smetaǵa sáıkes eseptelip, memlekettik baǵdarlamalar men jergilikti bıýdjet esebinen qarjylandyrylady, - dedi ınspektsııa basshysy.
Buǵan deıin biz Qyzylorda qalasy, Jeltoqsan kóshesi boıynda ornalasqan kópqabatty úılerdiń birinde 2 eresek adamnyń 3 jáne 4-qabattardyń arasynda lıft ishinde qalyp qoıǵanyn jazǵanbyz.