Qyzylordanyń kúrish alqaptarynda sý esepteý qurylǵylary synaqtan ótkizilip jatyr
ASTANA. KAZINFORM – Ybyraı Jaqaev atyndaǵy Qazaq kúrish sharýashylyǵy ǵylymı-zertteý ınstıtýty otandyq avtomattandyrylǵan sý ólsheý qurylǵylaryn synaqtan ótkizýdi bastady. Bul týraly Sý resýrstary jáne ırrıgatsııa mınıstrligi habarlady.
Bul qurylǵylar sýarý kanalynyń jeti núktesine ornatylǵan. Bul sýarý sýyn esepke alý dáldigin arttyryp, ony paıdalanýdy baqylaýdyń ashyqtyǵyn qamtamasyz etýge múmkindik beredi. Sonymen qatar ınstıtýt bazasynda avtomattandyrylǵan meteostantsııa jumys isteıdi. Onyń derekteri agrotehnıkalyq sharalardy josparlaýǵa, aýa raıy jaǵdaıyn baǵalaýǵa, egis alqaptarynyń jaı-kúıin baqylaýǵa jáne sý resýrstaryn tıimdi paıdalanýǵa qoldanylady. Qazirgi ýaqytta ınstıtýtta sý únemdeý tehnologııalaryn zertteý, tsıfrlyq platformalar men jasandy ıntellekt elementterin engizý, sondaı-aq kúrish sharýashylyǵynda sý resýrstaryn basqarýdyń zamanaýı tásilderin qoldaný baǵytynda birqatar ǵylymı-zertteý jumystary júrgizilip jatyr.
– Sýdy tsıfrlyq esepke alý júıelerin damytý men monıtorıng úderisterin avtomattandyrýǵa erekshe mán berilip otyr. Bul sý shyǵyny týraly neǵurlym naqty ári jedel derekter alýǵa, adamı faktordyń áserin azaıtýǵa, sý resýrstaryn bólýdiń ashyqtyǵyn arttyrýǵa jáne basqarýshylyq sheshimderdi negizdi túrde qabyldaýǵa múmkindik beredi. Avtomattandyrylǵan esepke alý jáne monıtorıng júıelerin engizý sý shyǵynyn azaıtýǵa, sý resýrstaryn utymdy paıdalanýǵa, agrarlyq salada tsıfrlyq tehnologııalardy keńinen qoldanýǵa jáne Qyzylorda oblysynyń sý sharýashylyǵyn basqarý tıimdiligin arttyrýǵa yqpal etedi,– dedi Sý resýrstary jáne ırrıgatsııa mınıstrliginiń Tsıfrlandyrý departamentiniń dırektory Erdáýlet Jumat.
Aıta keteıik, 2026-2027 oqý jylynan bastap sý sharýashylyǵy salasy úshin mamandar daıarlaıtyn kolledjderdiń tizimi taǵy eki oqý ornymen tolyǵady.
