Qyzylordanyń Qazaly aýdanynda quny 7 mln teńge kúrdeli ota tegin jasala bastady

QYZYLORDA. KAZINFORM — Qazalyda el boıynsha alǵash ret júrek yrǵaǵy buzylǵan naýqastarǵa kúrdeli ota jasala bastady. Medıtsınalyq saqtandyrý qorynyń ókilderi munyń tym qymbat turatynyn aıtyp otyr. Degenmen, «saqtandyrylǵan» degen mártebesi bar adamdar úshin tegin.

Aýdandyq kópbeıindi ortalyq aýrýhanada joǵary mamandandyrylǵan, ınvazıvtiligi tómen arıtmologııalyq otany júrgizýge Almatydaǵy № 7 qalalyq klınıkalyq aýrýhananyń ınterventsııalyq arıtmolog dárigeri Kanat Aldabergenuly, oblystyń shtattan tys arıtmolog dárigeri Nurbolat Lepesov shaqyryldy. 

Mamandar angıograf apparatynyń kómegimen alǵashqy 7 naýqasqa ota jasady. Sonyń biri — Áıteke bı kentiniń 67 jastaǵy turǵyny Keńes Jalmaǵambetov. Ol bes jyldan beri dárigerler baqylaýynda.

— Buǵan deıin júregim aýyryp, qan qysymym kóterilip, tynysym tarylatyn. Júregim dúrsildep soǵatyn. Elektrokardıostımýlıator ornatqaly beri ózimdi jaqsy sezinemin. Júregimniń soǵý jıiligi de qalpyna keldi, — dedi ol.

Al Órkendeý aýyldyq okrýginiń 65 jastaǵy turǵyny Úrzada Ábdimálikqyzy derti mazalaǵan soń oblys ortalyǵyna baryp em almaq bolǵan eken. Degenmen, óz aýdanynda qajetti kómek kórsetiletinin estip, jergilikti medıtsına kómegine júgindi. Ol da osydan keıin tynysy keńip sala bergenin jetkizdi.

Arıtmolog dáriger Qanat Aldabergenuly barlyq ota mindetti áleýmettik medıtsınalyq saqtandyrý júıesi aıasynda júzege asyrylatynyn atap ótti. 

— Mysaly, radıojıilikti ablıatsııanyń quny — shamamen 7 mln teńge. Biraq saqtandyrylǵan patsıentter úshin tegin. Patsıent em-domnan keıin birneshe saǵat ótkesin júre alady, — dedi ol.

Jyl basynan beri áleýmettik medıtsınalyq saqtandyrý qorynan Qazaly aýdandyq kópbeıindi ortalyq aýrýhanasyna shamamen 7,6 mlrd teńge bólindi.

Buǵan deıin Qazaqstanda mindetti áleýmettik medıtsınalyq saqtandyrý (MÁMS) júıesinde azamattardyń jeke klınıkalarda em alý múmkindigi keńeıgenin jazǵanbyz.