Qyzylordanyń qaı aýdandarynda jańa mektepter men Oqýshylar saraıy salyndy
ASTANA. KAZINFORM — Byltyr Qyzylorda oblysynda 13 bilim berý uıymy ashyldy. «Keleshek mektepteri» ulttyq jobasy aıasynda 10 jańa mektep salyndy. 2023 jyldan beri 9 mektepke japsarlas ǵımarat boı kóterdi. Nátıjesinde óńirde úsh aýysymdy mektepter máselesi túbegeıli sheshimin tapty. Bul týraly óńir ákimi Nurlybek Nálibaev eseptik kezdesýinde aıtyp berdi.
Ákimniń aıtýynsha, oblysta bilim berý salasyna sońǵy 3 jylda 812 mlrd 245 mln teńge bólindi. Bıyl 346 mlrd 800 mln teńge qarastyrylǵan.
— Sońǵy úsh jylda 5 mlrd 300 mln teńgege 15 mektepke kúrdeli jóndeý jumystary júrgizildi. Bıyl bul maqsatqa oblystyq bıýdjetten 2 mlrd 400 mln teńge bólinip, 9 mektep qaıta jańǵyrtýdan ótti. Prezıdent tapsyrmasyna sáıkes aldaǵy úsh jylda óńirimizdegi 51 mektep kúrdeli jóndeýden ótedi, — dedi oblys ákimi.
Kásipkerlerdiń demeýshiligimen Aral aýdany Toqabaı aýylyndaǵy apattyq mekteptiń ornyna 500 mln teńgege jańa bilim ordasy salyndy.
«Bilimdi qoldaý qory» arqyly 2 mlrd 333 mln teńgege Mergensaı aýylynda salynǵan 150 oryndyq mektep jaqyn kúnderi paıdalanýǵa beriledi. Osy qor esebinen 8 mlrd 400 mln teńgege fızıka-matematıka baǵytyndaǵy «Bilim-ınnovatsııa» lıtseı-ınternaty salyndy.
Sonymen birge, 11 mlrd teńgege balalar men jasóspirimderge arnalǵan «Syr juldyzdary» akademııasy ashyldy. Akademııada 6 baǵyt boıynsha 52 úıirme jumys isteıdi. Onda úlken jáne kishi basseınder, sport-jattyǵý, pándik, robototehnıka, kompıýterlik modeldeý jáne shyǵarmashylyq kabınetter bar. Budan bólek, aýlasynda fýtbol, voleıbol, basketbol, balalar oıyn alańdary jumys isteıdi. Akademııa kúnine 3 myń balaǵa deıin qyzmet kórsetedi.
— Oblysta 3 mlrd teńgeden astam qarjyǵa Jalaǵash, Jańaqorǵan, Shıeli aýdandarynda Oqýshylar úıi men Óner mektepteri salynyp, paıdalanýǵa berildi. «QazMunaıGaz» demeýshiligimen Qyzylorda qalasynda 2 mlrd 500 mln teńgege zamanaýı úlgidegi 350 oryndyq Oqýshylar saraıy salynǵan. Oǵan qosa, 4 mlrd 800 mln teńgege Mýzykalyq kolledjdiń jańa oqý ǵımaraty men jataqhanasy turǵyzyldy, — dedi Nurlybek Nálibaev.
Prezıdent saıabaǵynda 10 mlrd teńgege 300 oryndyq jyl boıy jumys isteıtin zamanaýı balalar tynyǵý lageri boı kóterýde. Onda 5 mlrd teńgege Botanıkalyq bilim berý ortalyǵynyń ǵımaraty salynyp jatyr.
Buǵan deıin óńir ákimi Qyzylorda oblysynda jaqsy jaǵdaıdaǵy joldar úlesi 95% asqanyn aıtqan edi.
Al Qyzylorda qalasynda kópqabatty úılerdi ystyq sýmen qamtýǵa 26 mlrd teńge bólindi.