Qyzylordanyń fýtbol klýby jeke basqarýǵa ótse de nege memleketten qarjylandyrylady
QYZYLORDA. KAZINFORM — Qyzylorda oblysynyń ákimdigi áleýmettik jelide taraǵan «Qaısar» fýtbol klýbynyń qarjylyq máselesi jónindegi jarııalanymǵa baılanysty túsinik berdi. Ony teriske shyǵaryp, fýtbol klýbynyń strategııalyq jospary men negizgi mindetterin bólisti.
2019 jyly «Qaısarǵa» oblystyq bıýdjetten 4 mlrd teńge bólindi. Sol kezeń úshin bul — oblystar arasyndaǵy eń kóp qarjy.
— 2020 jyly oblystyq bıýdjetten 2,6 mlrd teńge bólinip, 2021 jyly klýb quramyna 9 legıoner alyndy. Alaıda básekelestiktiń joǵary bolýynan jáne fýtbolshylardyń kásibı deńgeıiniń tómendiginen jergilikti komanda chempıonatta 19 upaı enshilep, týrnırlik kestede 13-orynda bolyp, Birinshi lıgaǵa tómendedi.
2022 jyly Nurlybek Mashbekuly oblysqa basshy bolyp kelgennen keıin jergilikti komandaǵa Premer-lıgaǵa ótýge tıis talaptar qoıyldy. Sol jyly bólingen 605 mln teńgemen jergilikti komanda Birinshi lıgada oınap júrgen bolatyn. 2023 jyly atalǵan klýbqa oblystyq bıýdjetten 1,2 mlrd teńge bólinip, durys jospardyń, qoıylǵan tıisti talaptardyń nátıjesinde jergilikti komanda Birinshi lıgadan Premer lıgaǵa ótti. 2024-2025 jyldar aralyǵynda komanda oblystyq bıýdjettiń 1,2 mlrd teńgesi esebinen jasyl alańda óner kórsetti, — dedi oblys ákiminiń orynbasary Meırambek Shermaǵanbet.
Oblys ákiminiń orynbasary jergilikti fýtbol klýby jeke basqarýǵa berilse de memleketten qarjylandyrý nelikten toqtamaǵanyn túsindirdi.
— «Qaısar» fýtbol klýbynyń 2020 jyldan bastap qalyptasqan 753 mln teńge kóleminde bereshegi bar bolatyn. Qazirgi kezge deıin klýb beresheginiń jartysy jabyldy. Prezıdent tapsyrmasyna sáıkes elimizde alǵashqylardyń biri bolyp qyzylordalyq «Qaısar» fýtbol klýby 2025 jyldyń sońynda jeke basqarýǵa ótti. Klýbtyń jańa ıesi — «TAU Group LTD» kompanııasynyń basshysy, jerlesimiz Islamǵalı Qozybaqov. Bıylǵy jyldan bastap jergilikti klýb jeke kásipkerdiń basqarýyna berildi. Aldaǵy 5 jylda «Qaısar» fýtbol klýbyna oblystyq bıýdjetten belgili bir kólemde qarjy qarastyrylady. Osy ýaqyt aralyǵynda qarjy kólemi kezeń-kezeńimen azaıyp, bes jyldan keıin oblystyq bıýdjetten qarjylandyrý tolyq toqtatylady. Bıyl jergilikti klýbqa bólingen qarjy 200 mln teńgege deıin qysqartyldy. Bıyl jergilikti «Qaısar» fýtbol klýbyna oblystyq bıýdjetten bólingen 995 mln teńgege memlekettik satyp alý zańyna sáıkes konkýrs ótkizilip, jeńimpaz atanǵan «TAU Group LTD» kompanııasyna qarjy bólindi, — dedi Meırambek Shermaǵanbet.
Jeke basqarýǵa berilgenniń tıimdiligi joq emes. Qazirgi tańda ınvestor 18 mlrd teńgege «Qaısar» akademııasyn salyp jatyr. Bıyl kúzde negizgi baza men jattyǵatyn 3 alańnyń qurylysy aıaqtalady. Keshen 2027 jyldyń sońyna deıin tolyǵymen paıdalanýǵa berilmek. Jergilikti ákimdik joba klýbtyń uzaq merzimdi damýyna baǵyttalǵan negizgi ınvestıtsııa kózi ekenin alǵa tartty.
— Jalpy klýbtyń strategııasy 5-10 jyldyq júıeli ósimge baǵyttalǵan. Joba aıasynda 7 tolyq ólshemdi jáne 2 balalar alańynyń qurylysy, sonymen qatar jabyq manej ben oıynshylardy qalpyna keltirýge arnalǵan medıtsınalyq ortalyq qarastyrylǵan. Akademııada tárbıelengen sportshylar bolashaqta jergilikti «Qaısar» fýtbol klýbyn bıik shyńnan kórsetedi dep nyq senimmen aıta alamyz. Ekinshiden, jańa stadıondy kútip ustaý shyǵynynyń jyldyq kólemi — 500 mln teńge. Bul — jeke ınvestordyń qarajaty, bıýdjetten oǵan eshqandaı qarjy bólinbegen. Úshinshiden, shet memleketterden keletin jaldamaly oıynshylardyń (legıonerler) shyǵyndaryn negizinen jeke ınvestor ózi ótep otyr. Stadıonnyń sapasy jáne arhıtektýralyq kelbeti zamanaýı talaptarǵa saı. Basqa óńirlerdegi «Qaısar Arena» sekildi stadıondardyń shyǵyny shamamen 600 mln teńgeden joǵary. Jańa stadıon sııaqty zamanaýı nysandardyń barlyǵy áleýmettik salalardan talan-tarajǵa túsip jatqan qarjyny toqtatý nátıjesinde únemdelgen, qaıtarylǵan qarajat esebinen salynǵan, — dedi oblys ákiminiń orynbasary.
Eske salaıyq, Túrkistan oblysynyń Qarjy jáne memlekettik aktıvter basqarmasy taıaýda «Turan» fýtbol klýbyn elektrondy saýdaǵa shyǵardy.
