Qyzylordanyń 100-ge jýyq kreatory Astanada bas qosty
QYZYLORDA. KAZINFORM — 12–13 qyrkúıek kúnderi Astana qalasynda «Creative Aimaq» respýblıkalyq jobasy aıasynda «Tamyrdan týyndyǵa…» atty kórme-jármeńke ótip jatyr, dep habarlaıdy oblys ákiminiń baspasóz qyzmeti.
Sharaǵa QR Mádenıet jáne aqparat vıtse-mınıstrleri Evgenıı Kochetov, Aıbek Sydyqov, Kreatıvti ındýstrııalardy damytý qorynyń basqarma tóraǵasy Erlan Qanalımov, oblys ákiminiń orynbasary Meırambek Shermaǵanbet jáne zııaly qaýym men BAQ ókilderi, elordalyq turǵyndar qatysty.
Joba Syr óńiriniń baı tarıhı-mádenı murasyn zamanaýı shyǵarmashylyqpen sabaqtastyryp, ulttyq qundylyqtardy jańa formatta tanytýǵa jáne tyń ıdeıalardy júzege asyrýǵa arnalǵan.
Іs-sharaǵa 100-ge jýyq kreator qatysyp, 21 ekonomıkalyq qyzmet baǵyty boıynsha avtorlyq týyndylary men shyǵarmashylyq ónimderin kópshilik nazaryna usynýda. Kelýshiler Syr boıynyń basty brendteriniń birine aınalǵan aq kúrishten salynǵan beıneleý óneri týyndylarymen tanysa alady. Shyǵarmalar kúrishtiń óńir tarıhy men turmysyndaǵy mańyzyn, Syr eliniń tabıǵaty men mádenı ereksheligin tanytady.
Sonymen qatar kórmege dástúrli qolóner mádenıetin dáripteıtin súıek, aǵash jáne kıizden jasalǵan ulttyq buıymdar qoıylǵan. Ár buıymda Syr boıyna tán ulttyq naqysh, dástúrli órnek jáne tabıǵı materıaldardy óńdeýdiń ózindik sheberligi kórinis tapqan.
Kreatıvti alańda Qyzylorda Hub mamandary óz jobalaryn, «Qyzylorda» telearnasy «Syr Travel», «Qyzylorda Expedition», «Qudaıy qonaq» sekildi kreatıvti jobalaryn tanystyrady.
Sonymen qatar eki kún boıy Qazaq Creative Hub alańynda Syr óńiriniń ónerpazdary jasandy ıntellekt tehnologııalaryn shyǵarmashylyqpen ushtastyrǵan kontserttik baǵdarlamasyn kópshilik nazaryna usynady.
Aıta keteıik, aımaqta kreatıvti ındýstrııany damytý baǵytynda belsendi jumys istep kele jatqan 146 kreatordyń 120-sy, ıaǵnı 82,2 paıyzy respýblıkalyq kreatorlar reestrine engizilgen. Bul kórsetkish Qyzylorda oblysyn respýblıka óńirleri arasynda alǵashqy úshtikke ornyqtyrdy.
