Qyzylordalyqtardyń jer kezegi nege 20 jyldan beri jyljymady
QYZYLORDA. KAZINFORM — Qyzylorda qalalyq aýyl sharýashylyǵy jáne jer qatynastary bóliminiń málimetine súıensek, oblys ortalyǵynda kezegin kútken 70 763 adam bar. Onyń 2 387-si 2005 jyly tirkelgen.
Búginde sol turǵyndarǵa jer ýchaskeleri tabystalyp jatyr. 2006 jylǵy eseptegi 11 509 adamnyń kezegi áli bastalǵan joq.
Ulttyq ekonomıka mınıstrliginiń 2015 jylǵy 27 naýryzdaǵy № 255 buıryǵymen bekitilgen qaǵıdanyń 6-tarmaǵyna sáıkes jeke turǵyn úı qurylysyna jer ýchaskesin suraǵan azamattardyń ótinishi arnaıy esepke alynady.
Ol bólip berýge arnalǵan alańdar daıyn nemese jeke turǵyn úı qurylysyna paıdalanylatyn bos aýmaqtar bolǵan kezde qanaǵattandyrylady.
— Qazirgi tańda Báıterek shaǵynaýdany men qalanyń basqa da aýmaqtarynan jaldaý merzimi aıaqtalǵan 1 883 jer ýchaskesin kezekte turǵandarǵa tabystaýǵa múmkindik bar. Alaıda, 2005 jylǵy kezektegi azamattardyń jer alýǵa qyzyǵýshylyǵy tómen. Sol sebepti 2005 jylǵy kezekti aıaqtaý múmkin bolmaı otyr. 2005 jylǵy jer kezegine tirkelgen azamattar jer ýchaskesin alý úshin egov.kz portaly arqyly qala ákimdigine ótinishpen júginýi tıis, — deıdi qalalyq ákimdiktiń aýyl sharýashylyǵy jáne jer qatynastary bóliminiń basshysy Meırambek Ájibekov.
2021 jyldyń naýryz aıynan bastap egov.kz elektrondy úkimet portalynda jeke turǵyn úı qurylysy úshin jer ýchaskesin alýǵa kezekke turý qyzmeti iske qosyldy.
Jyljymaıtyn múliktiń biryńǵaı memlekettik kadastry aqparattyq júıesi qoldanysqa engizilip, 2005 jyldan bastap kezekte turǵandar tizimi osy júıede kórinis tapty.
Egov.kz elektrondy portaly arqyly kezekke turyp, onyń rettiligin map.gov4c.kz saıtynan kórýge bolady.
Jeke turǵyn úı qurylysy úshin jer ýchaskelerine quqyqtar berý qaǵıdasynyń talabyna sáıkes jergilikti atqarýshy organnyń suranymy boıynsha qaıtys bolǵan, basqa jerge kóship ketkender avtomatty túrde tizimnen shyǵarylady.
Onyń rettik nómiri ózinen keıingi adamǵa avtomatty túrde beriledi. Keıingilerdiń rettik nómiri de osylaı ózgeredi.
Jer zańnamasynyń talabyna sáıkes jeke turǵyn úı qurylysy úshin jer ýchaskesi ýaqytsha óteýli jer paıdalaný (jaldaý) quqyǵymen 3 jyl merzimge tabystalady.
Jer kodeksiniń 37-baby boıynsha óz mindetin tıisinshe oryndaǵan ýaqytsha jer paıdalanýshy kodekstiń 44-babynyń 2-bóliginde kózdelgen tártippen jańa merzimge shart jasasýǵa quqyly.
Shart merzimi aıaqtalǵanǵa deıin jer ýchaskesin ıgermegen jaǵdaıda jer ýchaskesi memleket menshigine qaıtarylady.
Eger jer ýchaskesi jeke turǵyn úı qurylysyna paıdalanylmasa, jaldaý merzimin uzartý nemese jeke menshikke tabystaý múmkin bolmaıdy.
— 2024 jyldan beri jer ýchaskesin ıgermeýine jáne jaldaý merziminiń aıaqtalýyna baılanysty 331 telim memleket qoryna qaıtaryldy. 2024 jyly 58 jer ýchaskesi tabystalyp, 184 ýchaskeniń jaldaý merzimi uzartyldy. Igerilmegen jáne jaldaý merzimi aıaqtalǵan 315 jer ýchaskesi memleket qoryna qaıtaryldy. Turǵyndardyń muqtajdyǵyn qamtamasyz etý maqsatynda Báıterek shaǵynaýdanynan kólemi 150 gektar egjeı-tegjeıli josparlaý jobasy boıynsha - 1 267, jaldaý merzimi aıaqtalǵan - 1 883, bas-aıaǵy 3 150 jer ýchaskesin kezek boıynsha tabystaýǵa múmkindik bar, — deıdi Meırambek Ájibekov.
Buǵan deıin habarlaǵanymyzdaı, bıyl Qyzylorda qalasynyń bas jospary qaıtadan bekitiledi. Oǵan qala mańyndaǵy saıajaılar da qosylmaq.