Qyzylordalyqtar soǵys qaharmandaryn bir mınýt únsizdikpen eske aldy
QYZYLORDA. KAZINFORM — Búgin Qyzylordadaǵy «Taǵzym» alańynda Jeńistiń 80 jyldyǵyna arnalǵan saltanatty is-shara ótti. Bul týraly oblys ákimdiginiń baspasóz qyzmeti habarlady.
Oblys ákimi Nurlybek Nálibaev aımaq turǵyndaryn aıryqsha merekemen quttyqtady.
— Uly Jeńistiń 80 jyldyǵyna oraı ótken áskerı sherýde Prezıdentimiz Qasym-Jomart Kemeluly: «Biz eldik úshin kúresken batyr babalardy ulyqtaımyz. Otan qorǵaý jolynda opat bolǵan bozdaqtarǵa taǵzym etemiz» deı kele 500-ge jýyq kóshege Qazaqstan qaharmandarynyń esimi beriletinin atap ótti. Osy oraıda, erekshe atap ótý qajet, onyń 146-sy — oblys ardagerleri. Jyl aıaǵyna deıin qaharmandar esimi kóshelerge beriledi. Surapyl soǵys jeńimpazdarynyń eren erligin, sheksiz batyrlyǵyn jadymyzda jańǵyrtý, olardy máńgi este saqtaý — qasıetti boryshymyz, — dedi Nurlybek Nálibaev.
Saltanatty sharada surapyl soǵys jyldary erlik kórsetken qaharmandar qurmetine bir mınýt únsizdik jarııalanyp, eskertkishke gúl shoqtary qoıyldy.
Rásimde Parlament Senatynyń depýtaty Rýslan Rústemuly quttyqtaý sóz sóıledi. Qoǵam qaıratkerleri Najmadın Túrikpenuly, Aıtbaı Kósherbaıuly ıgi tilegin aıtyp, batasyn berdi.
Sonymen qatar Jeńisti jaqyndatýǵa ólsheýsiz úles qosqan tyl ardagerleri «Uly Otan soǵysyndaǵy Jeńiske 80 jyl» merekelik medalimen marapattaldy.
Merekege oraı oblys ákimi Nurlybek Nálibaev Syrdarııa aýdanynyń Tereńózek kentinde turatyn Uly Otan soǵysynyń ardageri ıAhııa Tasyrovty Jeńistiń 80 jyldyǵymen quttyqtap, qurmet kórsetti.