Qyzylordalyqtar referendým kúni qoǵamdyq kólikte tegin júredi

QYZYLORDA. KAZINFORM – 15 naýryzda, ıaǵnı elimizdiń jańa Konstıtýtsııasyn qabyldaýǵa arnalǵan respýblıkalyq referendým ótetin kúni Qyzylorda qalasynda qoǵamdyq kólikter halyqqa tegin qyzmet kórsetedi.

«Qyzylorda avtobýs parki» JShS-niń habarlaýynsha, mundaı sheshim turǵyndardyń mańyzdy saıası naýqanǵa qatysýyna qolaıly jaǵdaı jasaý maqsatynda uıymdastyrylyp otyr.

- Mekeme qalashilik jolaýshylar tasymalynyń barlyq baǵytyn qamtamasyz etedi. Búginde Qyzylorda avtobýs parkinde 300 avtobýs bar, olar 32 baǵyt boıynsha turaqty qyzmet kórsetedi. Qala ishinde avtobýs marshrýttary birtutas jelige biriktirilgen, - delingen habarlamada.

Jolaýshy tasymaldaıtyn avtobýstar 2GIS, ıAndeks GO jáne ıAndeks Karta uıaly qosymshasyna tirkelgen. Óz kezeginde qala turǵyndary men qonaqtary dittegen jerine qosymsha arqyly qaı baǵyttyń qaı ýaqytta júretinin baqylaı alady.

Buǵan deıin biz Almatyda múgedektigi bar turǵyndar respýblıkalyq referendým ótetin kúni saılaý ýchaskelerine barý úshin «Invataksı» qyzmetin tegin paıdalana alatynyn habarlaǵanbyz.