Qyzylordalyqtar Memleket basshysyna óńirge kórsetken qoldaýy úshin alǵys aıtty
ASTANA. KAZINFORM - Jaqynda Memleket basshysy Qasym-Jomart Kemeluly Toqaev Qyzylorda oblysyna jumys saparymen kelip, aımaqtyń damýyna serpilis bergen jobalarmen tanysty.
Syr jurtshylyǵy Prezıdentimizdiń birlik pen turaqtylyqqa, halqymyzdyń ál-aýqatyn jaqsartýǵa baǵyttalǵan bastamalaryn qoldap keledi.
Olar aımaqtaǵy ıgilikti isterdiń júzege asýyna erekshe qamqorlyq kórsetkenin jaqsy biledi. Óıtkeni saıası-ekonomıkalyq reformalardyń nátıjesi Qyzylorda oblysynyń búgingi damý serpininen anyq baıqalady.
Memleket basshysynyń óńir jurtshylyǵymen kezdesýde aıtqan álemdegi ahýal, sý tapshylyǵy, jastar tárbıesi, jasandy ıntellekt dáýiriniń jańashyldyqtaryn paıdalaný týraly paıymdary barshaǵa oı saldy. Ásirese, Astana men Almaty qalalaryndaǵydaı táýlik boıy qyzmet kórsetetin úshinshi Prezıdenttik kitaphanany Qyzylorda qalasynda salý týraly bastama jurtshylyqty qýanyshqa keneltti.
Prezıdenttiń:«Oblys jalpy jaqsy damyp kele jatyr. Qarqyny joǵary»,- degen oń baǵasy yntymaǵy men birligi jarasqan Syr halqynyń mereıin ósirdi. Sapardan soń, qyzylordalyqtar Memleket basshysy Qasym-Jomart Kemelulyna hat joldap, alǵys bildirdi.
«Sizge barsha Syr jurtshylyǵy atynan shynaıy alǵysymyzdy, zor rızashylyǵymyzdy bildiremiz. Ádiletti, Qýatty, Taza Qazaqstandy qurý jolyndaǵy barlyq bastamalaryńyzdy qoldaımyz! Táýelsiz elimizdiń damýyna baǵyttalǵan tarıhı mıssııańyzǵa mol jetistik, myqty densaýlyq jáne sarqylmas jiger tileımiz!»- delingen hatta.
Syr jurtshylyǵynyń atynan joldanǵan alǵysty jetkizgender arasynda «Qazaqstannyń Eńbek Erleri», ardagerler men áıelder keńesi, qoǵamdyq keńes, zııaly qaýym, azamattyq qoǵam ókilderi men jastar bar.