Qyzylordalyqtar kúrish orý naýqanyna daıyndalyp jatyr

QYZYLORDA. KAZINFORM — Bıyl Qyzylorda oblysynda 189,6 myń gektar jerge aýyl sharýashylyǵy daqyldary egildi. Onyń ishinde 80,9 myń gektar jerde kúrish sýǵa bastyryldy. Bul týraly Kazinform tilshisine oblystyq aýyl sharýashylyǵy jáne jer qatynastary basqarmasynyń baspasóz qyzmeti habarlady.

Dıqandar erte egilgen astyq daqyldaryn qambaǵa quıdy. Endi mal azyǵy túrindegi, maıly daqyldarmen qatar kókónis, baqsha daqyldaryn jınap jatyr.

- Osyǵan deıin 71,5 myń gektar (88%) kúrish egisiniń sýy baılandy. 5,8 myń gektar (7,2%) sypyryqtaný, 12,7 myń gektar (15,7%) gúldený, 28 myń gektar (34,4%) sútti pisý, 34,4 myń gektar kúrish balaýyz pisý satysynda. 66,5 myń gektar kúrish ústeý arqyly qorektendirilip, 66,8 myń gektar jer aramshópke qarsy óńdeldi. Negizgi daqyldy orý jumystary tamyz aıynyń aıaǵynda bastalyp, qazannyń ekinshi onkúndiginen keshiktirmeı tolyq aıaqtaý josparlanǵan, - delingen habarlamada.

Sharýashylyqtar 4 myńnan astam tehnıkany kúzgi egin jınaý naýqanyna qatystyrý úshin jóndeýden ótkizip jatyr. Oblysqa 5,3 myń tonna janar-jaǵarmaı ákelý kelisilse, sonyń 1,9 myń tonnasynyń qarjysy tólendi. Jergilikti operatorlar ázirge 1,5 myń tonnasyn jetkizip berdi.

– Arzandatylǵan dızel otynynyń lıtri sharýashylyqtarǵa 254 teńgeden taratylady. Sharýashylyq qurylymdary qajetti tuqymdyq materıaldarymen tolyq qamtamasyz etilgen. Egiske qajet 64,6 myń tonna mıneraldyq tyńaıtqysh pen 74,1 myń lıtr gerbıtsıd tolyq satyp alyndy, - dep atap ótti basqarma ókilderi.

Buǵan deıin biz Qyzylorda oblysynda vegetatsııalyq kezeń kúrdeli jaǵdaıda ótip jatqanyn, eginge qajetti sý kólemine suranys shegine jetkenin jazǵanbyz.