Qyzylordalyq jaýyngerdiń súıegi 83 jyldan keıin týǵan topyraǵynda jerlendi
QYZYLORDA. KAZINFORM – Ekinshi dúnıejúzi soǵysynda qaza tapqan Sılan Mámetovtiń súıegi 83 jyldan keıin Qyzylorda oblysyna jetkizilip, týǵan jerine jerlendi. Bul ıgilikti iske «Atamnyń amanaty» qoǵamdyq birlestigi uıytqy boldy.
Qoǵamdyq birlestik 1912 jyly Qyzylorda oblysynda dúnıege kelgen qazaq jaýyngeri Mámetov Sılannyń súıegin Qarýly kúshterdiń arnaıy áskerı-kólik ushaǵymen týǵan jerine jetkizdi.
Maıdangerdiń súıegin 2023 jyldyń mamyr aıynda Reseıdiń «Eho voıny» izdestirý toby qazba jumystary kezinde tapqan edi.
Belgisiz soldattyń kim ekeni moınyndaǵy medalonynda jazylǵan málimet boıynsha anyqtalǵan.
Sılan Mámetov 144-shi atqyshtar dıvızııasynyń 785-shi atqyshtar polkiniń sapynda soǵysqan.
1941 jyly 7 qarashasynda Máskeý túbindegi Apalşıno selosy úshin shaıqasta qaza tapqan.
Súıegi Máskeý oblysy Rýza aýdany Novo-Gorbovo selosyndaǵy baýyrlastar zıratynan 300 metr qashyqtyqta tabylǵan.
Sılan soǵysqa deıin Qyzylorda oblysynda turǵan, otbasy qurǵan.
Onyń tikeleı urpaǵy men týystaryn izdestirý ázirge eshqandaı nátıje bergen joq.
Maıdan dalasynda qaza tapqan jaýyngerdiń súıegin týǵan jeri Qazaly aýdanynyń ákimdigi barlyq jón-joralǵysymen jerlendi.
«Atamnyń amanaty» qoǵamdyq birlestigi oblystyq ólketaný mýzeıine S. Mámetovtyń jeke zattary — soldat kaskasy men medalonyn tabys etti.
Eske salsaq, budan buryn soǵysta qaza tapqan jambyldyq maıdangerdiń súıegi 80 jyldan keıin týǵan jerine jetkizilgen edi.
