Qyzylordalyq jas tehnokrat dárigerden jyldam jumys isteıtin JI júıesin oılap tapty
QYZYLORDA. KAZINFORM – Qyzylordalyq jas tehnokrat Asyljan Abdýllaev transplantatsııa kezinde aǵzany qabyldamaý qaýpin genetıkalyq jáne klınıkalyq derekter negizinde boljaıtyn jasandy ıntellekt júıesin jasap shyqty.
Kazinform tilshisimen suhbatynda ol medıtsına salasyna arnalǵan ınnovatsııalyq sheshim dárigerlerge otaǵa deıin transplantatsııanyń sátti ótý múmkindigin aldyn ala baǵalaýǵa kómektesetinin atap ótti.
- Qazirgi kúni álemde jyl saıyn 100 myńnan astam búırek transplantatsııasy jasalady. Biraq sonyń shamamen 33%-yn ımmýndyq júıe qabyldamaı sátsiz aıaqtalady. Óıtkeni sheshim kóbine shekteýli derekter men dárigerdiń tájirıbesi negizinde ǵana qabyldanady. CortexAI júıesi osy máseleni sheshý úshin genetıkalyq sáıkestik (HLA), bıomarker, klınıkalyq kórsetkish jáne logıstıkalyq faktorlardy biriktirip, 30-dan astam parametrdi taldaıdy. Júıe transplantatsııa nátıjesin, aǵzanyń qabyldanbaý qaýpin jáne onyń ómir súrý uzaqtyǵyn boljaıdy. Jobanyń artyqshylyǵy sol, taldaý dáldigi 84%-ǵa deıin artyp, taldaý ýaqyty 12 saǵattan 33 sekýndqa deıin qysqarady. Al transplantattyń qyzmet etý merzimi 4 jyldan astam ýaqytqa uzarady. Júıe tájirıbeli dárigerden 1300 ese jyldam jumys isteı alady, - dedi keıipkerimiz.
Asyljan Abdýllaev jetekshilik etken komandada jasandy ıntellekt, medıtsına jáne big data mamandary jumys istedi. Barlyǵy – halyqaralyq jáne ulttyq jarys jeńimpazdary. Adam densaýlyǵyna oń yqpal etetin sheshim búginde 4 pılottyq medıtsınalyq ortalyqta testilenip jatyr. Sodan keıin klınıkalar men bıobankterge API arqyly ıntegratsııalanady.
- Bizdiń jobanyń basty ereksheligi – bıostatıstıka men jasandy ıntellektini biriktire otyryp, transplantatsııa nátıjesin otaǵa deıin boljaı alatynynda. Osylaısha transplantatsııadaǵy táýekeldi azaıtyp, patsıentterdiń ómir súrý sapasyn jaqsartýǵa úles qosqymyz keledi, - dedi komanda jetekshisi.
Asyljan Abdýllaev – Kyzylorda Hub bıznes-ınkýbatorynyń Startup Orda baǵdarlamasynyń túlegi. Ol qazir Astana IT ýnıversıtetinde bilim alyp júr. Atalǵan jobasymen jýyrda Shymkentte ótken «Digital Qazaqstan Battle» ulttyq startap batlynyń fınalynda 2-oryndy ıelenip, 5 mıllıon teńge ıelendi. Jas ónertapqysh buǵan deıin jasandy ıntellektini qazaq tilinde sóıletip, kópshiliktiń oń baǵasyn aldy.
Eske salaıyq, jaqynda Qyzylorda oblystyq tsıfrlyq tehnologııalar basqarmasy jańadan qurylyp, onyń basshysy bolyp Sábıt Ibadýlla taǵaıyndaldy.
