Qyzylordalyq jas ǵalym jasýshalardyń qartaıýyn tejeıtin bıopreparat jasady
QYZYLORDA. KAZINFORM — 23 jastaǵy Merýert Tólegenqyzy — Qorqyt ata atyndaǵy Qyzylorda ýnıversıtetiniń fızıka-hımııalyq taldaý ádisteri ınjenerlik beıindegi zerthanasynyń ınjeneri.
Ol «Maral múıizi men jantaq syǵyndysynyń antıoksıdanttyq qasıetteri» atty zertteý jumysyn hımııa ǵylymdarynyń kandıdaty, professor Nurbol Appazovtyń jetekshiligimen bir jyl boıy júrgizgen. Zertteý nátıjesinde jantaq ósimdigi men maral múıiziniń bıologııalyq belsendi qosylysy negizinde antıoksıdanttyq jáne profılaktıkalyq áseri bar tabıǵı preparat daıyndady.
— Eki ekstraktiniń quramyndaǵy antıoksıdanttar zııandy zattardy beıtaraptandyrady. Sol arqyly jasýshamyzǵa zııan tımeıdi. Olardyń qozǵalysy ońaı bolady. Adamǵa energııa beredi. Qospa jasýshalardyń qartaıýyn tejep, sol kúıinde saqtap qalýǵa kómektesedi. Maral múıizinen alynatyn bıologııalyq belsendi ekstrakttar ǵylymda burynnan belgili. Biraq jantaq ósimdigimen biriktirip antıoksıdanttyq qasıeti joǵary bıologııalyq belsendi qospa alý jańa ǵylymı baǵyt sanalady, — dedi jas ǵalym.
Tabıǵatta 22 túrli amın qyshqyly kezdesse, maral múıizinde onyń 18 túri bar. Ol ımmýnıtetti kúsheıtip, júıke júıesin tynyshtandyratyn, býyn (artrıt, osteohondroz) jáne júrek-qan tamyrlary aýrýlaryn emdeıtin biregeı qasıetke ıe. Al jantaq shóbin halqymyz erte zamannan beri emdik maqsatta paıdalanyp keledi.
— Jobanyń taǵy bir ózekti tusy álemde, sonyń ishinde elimizde júrek-qantamyr aýrýynyń kóbeıýimen baılanysty. Munyń negizgi sebebi — ateroskleroz. Al onyń basty molekýlalyq mehanızmi — totyǵý stresi, ıaǵnı aǵzada belsendi ottek formalarynyń shamadan tys jınalýy. Joba aıasynda osy tabıǵı shıkizattardy paıdalana otyryp, júrek-qantamyr júıesin qorǵaýǵa baǵyttalǵan profılaktıkalyq ónim jasaldy, — dedi Merýert Tólegenqyzy.
Jobany júzege asyrýǵa laıyq oryn retinde Shyǵys Qazaqstan oblysynyń Katonqaraǵaı aýdanynda ornalasqan «AKTIV GROUP» seriktestiginiń óndiristik bazasy tańdaldy. Endi aýdandaǵy maral ósiretin sharýashylyqtarmen kelisimshart negizinde shıkizat alý josparlanyp otyr.
Jas ǵalym otandyq ǵylym men óndiristi ushtastyrýǵa arnalǵan jobasy arqyly «Ǵylym qory» AQ uıymdastyrǵan 2025-2027 jyldarǵa arnalǵan ǵylymı ázirlemelerdi kommertsııalandyrý konkýrsynyń jeńimpazy atandy. Ol úshin 350 mıllıon teńge granttyq qarjylandyrýǵa ıe boldy. Jan-jaqty zerttelgen, memleketten qoldaý tapqan bıopreparat kelesi jyly óndiriske engizilmek.
Buǵan deıin qyzylordalyq qos stýdenttiń qaýipti saıttardy anyqtaıtyn baǵdarlama jasaǵanyn habarladyq.