Qyzylordalyq ustaz eki myńdaı jádigerdi 50 chemodanǵa jınaǵan

Mýzeıden tarıhy 200 jyldan asatyn arba, qamystan jasalǵan sandyq, sııaly qalam, maısham, mekteptiń alǵashqy qońyraýy, Keńes Odaǵy kezindegi oqýshy partasy men portfeli, oblystyń eń alǵashqy telefon anyqtamalyǵy, ulttyq buıymdar, mýzykalyq aspaptar, ydys-aıaq sııaqty kóptegen kóneniń kózin tabasyz. «Mýzeı apa» atanyp ketken 75 jastaǵy ustaz munyń barlyǵyn jınaýǵa jarty ǵasyrdan asa ýaqyty men jalaqysynyń teń jartysyn jumsaǵan.

- Arbany atqa da, túıege de, ógizge de jekken. Keminde 200 jyl bolǵan. Kıizden basylǵan jaınamaz bar, ony úlken mýzeılerden tappaısyz. Alash arystary Mustafa Shoqaı, Sáken Seıfýllın ustaǵan portfeldermen tanysýǵa bolady. Qazaqstannyń Halyq artısi, kıno jáne teatr qaıratkeri Ámına Ómirzaqovanyń «Taqııaly perishte» fılminde tartqan shálisi toqylǵan apparatty Orynbordan alyp keldim. Qaı jerge barsam da qur qol qaıtpaımyn. Erekshe, eski dúnıeni kórsem, satyp alamyn. Bulardyń ishindegi eń qymbaty – arba. Ulym satyp áperdi. Ony munda jetkizýdiń ózi muń boldy, - dedi Kúlásh Almatshaeva.

Mýzeı meńgerýshisi qoǵam jáne memleket qaıratkeri Turar Rysqulovtyń sýreti kestelengen kilemsheni qalaı tapqanyn aıtyp berdi.

- Oqýshylarymyzdyń biriniń anasy týysynyń úıine qydyryp barǵan. Edenge osy kilemsheni tósep tastapty. Úı ıeleri onda kim beınelengenin bilmeıdi eken. Ol tarıhı tulǵany aıaqasty etýge bolmaıtynyn aıtyp, maǵan jetkizip berdi. Jýyp, áreń tazarttym, - dedi ol.

Jádigerler salynǵan 50 chemodannyń eń eskisi 1941 jyly Almatyda jasalǵan. Keıipkerimiz «Chemodandaǵy mýzeımen» talaı kórmege qatysyp, oljaly qaıtqan.

- Aqyn Muqaǵalı Maqataevqa arnalǵan kórmede elimizdiń 19 qalasynan kelgen kollektsıonerler arasynan ozyp shyqtym. Qarasazdaǵy kórmege jádigerlerdi qapqa salyp aparǵanmyn. EXPO-ǵa da solaı jetkizýge týra keldi. Biraq budan buıym zaqymdalýy múmkin. Sóıtip júrgende enemniń chemodanyn paıdalaný týraly oı keldi. Ol keıin meniń vızıtti kartochkama aınaldy. «Chemodandaǵy mýzeımen» qalanyń búkil mektebin aralap, oqýshylarǵa tanystyrǵanmyn. 2018 jyly áleýmettik ıdeıalar jáne jobalar jármeńkesine qatysyp, osy jobanyń arqasynda jeńimpaz bolyp, 10 mln teńge syıaqy utyp aldym, - dedi keıipkerimiz.

Kollektsıoner ustaz orys tili men ádebıeti pániniń muǵalimi bolyp eńbek etken. Odan bólek, qoǵamdyq jumystarǵa belsene aralasyp, kásipodaq, mekteptegi partııa uıymynyń basshysy, qalalyq komıtet bıýrosynyń múshesi, mektep dırektorynyń orynbasary qyzmetterin abyroımen atqarǵan. Oblystyq jáne respýblıkalyq deńgeıdegi birqatar marapattyń ıegeri. Mektepte jarty ǵasyrdan beri taban aýdarmaı eńbek etip keledi. Áli kúnge janynyń qalaýy bolǵan jumysynan qol úzgen joq.

Buǵan deıin biz Ortalyq Azııadaǵy eń eski áýejaı Qyzylorda oblysy Qarmaqshy aýdanyń Josaly kentinde bolǵany týraly jazǵanbyz.

Sondaı-aq Aqtóbede aýdandaǵy jádigerler qalaı saqtalǵany týraly jazdyq.