Qyzylordalyq tutynýshylar 21 mln teńge qarjysyn qaıtaryp aldy

QYZYLORDA. KAZINFORM — Qyzylorda oblysy boıynsha saýda jáne tutynýshylardyń quqyqtaryn qorǵaý departamentine bıyl 10 aıda tutynýshy quqyǵy buzyldy degen negizben 770 ótinish tústi. Bul ótken jyldyń osy kezeńindegi kórsetkishten 2,1 ese artyq. 

Departament basshysy Erqasym Súleımenovtiń sózine súıensek, aryz-shaǵymnyń 64,5%-y bólshek saýda, 7%-y elektrondy saýda, 4,5%-y qoǵamdyq tamaqtaný, al 1,9%-y turǵyn-úı kommýnaldyq sharýashylyq qyzmeti salalaryna qatysty.

— Zańǵa sáıkes qaraý qorytyndysymen 392 ótinish qanaǵattandyryldy. 48 ótinish boıynsha tutynýshyǵa quqyqtaryn túsindirdik. 258 ótinish basqa memlekettik organdarǵa joldansa, ótinish ıeleri 67-sin qaıtaryp aldy. Nátıjesinde tutynýshylarǵa barlyǵy 21 mln teńge kólemindegi qarajatynyń qaıtarylýyna yqpal ettik. Ótken 10 aı ishinde 54 naryq sýbektisine tekserý júrgizdik, anyqtalǵan kemshilikter boıynsha 0,5 mln teńge kóleminde aıyppul salyndy, — dedi Erqasym Súleımenov.

Adamdardyń kóbi qazir onlaın saýda jasaýǵa kóshkenmen esepti kezeńde óńirde nebári 54 adam elektrondy saýda boıynsha shaǵym túsirgen. Olar satýshylardyń ózderin aldaǵanyna, sapasyz taýar usynǵanyna, taýardy aıyrbastaýdan nemese qaıtarýdan bas tartqanyna renish bildirgen. 

— Jurttyń kóbi Kaspi, Ozon, Wildberries sııaqty onlaın dúkender arqyly saýda jasaıdy. Alaıda, oblystyq departament bolǵandyqtan shaǵym túsken jaǵdaıda biz Qyzylorda oblysy aýmaǵyndaǵy satýshylardy ǵana teksere alamyz. Satý núktesi basqa jaqta ornalasqan bolsa, túsken aryz-shaǵymdy 3 jumys kúni ishinde sol oblystardaǵy departamentterge joldaımyz. Ozon, Wildberries dúkenderiniń bas keńsesi Reseıde, degenmen, olardyń ókilderimen ortaq chatymyz bar, qandaı da bir ótinish tússe, sonda jiberemiz. Mindetti túrde jaýap beredi, aqshasyn qaıtaryp bergen jaǵdaılar boldy, — dedi departament basshysy.

Erqasym Súleımenov óz tájirıbesindegi qymbat keıs týraly aıtyp berdi.

— Qala turǵyny kólik salonynan 11 mln teńgege kólik satyp alǵan. Ol bir jarym jyl ishinde birneshe ret buzylǵan. Qansha ret jóndese de qaıta-qaıta buzylyp, mazasy qashqan. Sosyn sotqa júginýine týra kelipti. Ózim úshinshi tulǵa, ıaǵnı memlekettik organ ókili esebinde sot otyrysyna qatystym. Satyp alǵan taýar sapasyz bolsa, satýshy ony aýystyryp nemese aqshasyn qaıtaryp berýi kerek. Sot sheshimimen salon satyp alýshyǵa kóliktiń tolyq somasyn qaıtaryp berdi. Tehnıkalyq jaǵynan kúrdeli taýar degen uǵym bar. Avtokólik soǵan jatady. Aýystyryp nemese aqshasyn qaıtaryp berý úshin onyń eleýli kemshiligi bolýy jáne sony dáleldep shyǵý kerek, — dedi ol.

10 aıda Saýda qyzmetin retteý týraly zańnama talaptarynyń saqtalýy baǵytynda oblystaǵy 176 kásipkerlik sýbektisi tekserildi. Sonyń 120-synda zań buzylǵan. Ákimshilik quqybuzýshylyq týraly Kodeks talaptaryna sáıkes 69 kásipkerge 1,3 mln teńge kóleminde aıyppul salyndy.

Eske salsaq, elimizde azamattardyń tutynýshy quqyǵyn qorǵaýyn talap etken ótinishterdiń sany úsh ese artqan. Kóbine qazaqstandyqtar bólshek jáne elektrondy saýda, sondaı-aq turmystyq qyzmetter boıynsha shaǵym túsiredi.