Qyzylordalyq túlekterge arnalǵan ákim granty berilmeıtin boldy
QYZYLORDA. KAZINFORM — Mektep bitirgen ul-qyzy memlekettik bilim grantyna ilinbeı qalǵan qyzylordalyqtar úshin oblys ákiminiń granty úlken qoldaý edi. Alaıda bıyl ol berilmeıtin boldy.
Ata-analar tarapynan «nelikten?» degen suraq kóbeıgen soń Kazinform tilshisi munyń sebebin anyqtady. Oblystyq jumyspen qamtýdy úılestirý jáne áleýmettik baǵdarlamalar basqarmasy málimdegendeı, bıyl Qorqyt ata atyndaǵy Qyzylorda ýnıversıtetinde 160 grant pen jeńildik (onyń ishinde 100% — 20, 50% — 10, 25% — 60, 10% — 70) jáne «Qazaqstan halqyna» qorynan 12 grant qarastyrylǵan.
— Mundaı granttar respýblıkadaǵy joǵary oqý oryndaryndaǵy talapkerler úshin de qarastyrylǵan. Atap aıtqanda, rektor granttary bólinip, «Qazaqstan halqyna» qory tarapynan qajet mamandyqtar boıynsha joǵary oqý oryndaryna bilim granttary usynylyp keledi. Osyǵan baılanysty áleýmettik qoldaý sharalaryn birizdendirý nátıjesinde oblys ákiminiń áleýmettik osal sanattaǵy mektep túlekterine arnalǵan bilim granty bıyldan bastap toqtatyldy, — delingen habarlamada.
Basqarma granttar men jeńildikterdiń talaby týraly tolyq aqparat alý úshin joǵary oqý oryndarynyń qabyldaý komıssııalaryna júginýge shaqyrdy.
Buǵan deıin áleýmettik jelide «Qorqyt ata atyndaǵy Qyzylorda ýnıversıtetine qosymsha rektor grantyna nemese bosaǵan bilim granttaryna oqýǵa túsirip beremiz» degen mazmundaǵy túrli jarnamalar men habarlamalar tarady. Degenmen, ýnıversıtet ákimshiligi munyń shyndyqqa janaspaıtynyn málimdedi.
