Qyzylordalyq stýdent JEO kúlinen tósenish taqtaıshalaryn jasap shyǵardy

QYZYLORDA. KAZINFORM – Qorqyt ata atyndaǵy Qyzylorda ýnıversıtetiniń jas zertteýshileri jylý elektr ortalyǵynyń kúl-qaldyǵy men Tasbóget ken ornynyń shaǵyl qumyn paıdalanyp, tósenish taqtaıshalaryn óndirý tehnologııasyn ázirledi.

Balaýsa Musabek
Foto: Balaýsa Musabektiń jeke muraǵatynan

Joba avtory Balaýsa Musabek ýnıversıtette «Qurylys» bilim berý baǵdarlamasy boıynsha bilim alyp júr. Ǵylymı jetekshisi – PhD, tehnıka ǵylymdarynyń doktory Gúlnur Jaqypova. Ol bul ǵylymı baǵytty 2024 jyly qorǵaǵan dıssertatsııalyq jumysynda qarastyrǵan. Ǵylymı zertteý nátıjesin keıin shákirtimen birge naqty óndiristik jobaǵa aınaldyrýdy qolǵa aldy.

Balaýsa Musabek
Foto: Balaýsa Musabektiń jeke muraǵatynan

Joba avtorlarynyń aıtýynsha, Qyzylorda jylý elektr ortalyǵynan shyǵatyn kómir kúli qala syrtyndaǵy aýmaqtarda jınalyp, qorshaǵan ortaǵa áser etedi.

- Kúl beton quramyndaǵy mıneraldy qospa retinde, al qum maıda tolyqtyrǵysh retinde qoldanylady. Osylaısha qaldyq kólemin azaıtamyz. Zertteý nátıjesinde taqtaıshanyń eń tıimdi quramynyń syǵýǵa beriktigi 75,42 MPa-ǵa jetti. Bul baqylaý quramynan shamamen 23 paıyzǵa joǵary. Sonymen qatar sý sińirý qabileti tómendep, qajalýǵa tózimdiligi artty. Aıazǵa tózimdiligi F300 kórsetkishine sáıkes baǵalandy, – dedi Balaýsa Musabek.

Ónimniń aıazǵa tózimdiligin anyqtaý úshin 45 tsıkldik synaq júrgizildi. Budan bólek, materıaldyń mıkroqurylymy arnaıy ádister arqyly taldandy.

Balaýsa Musabek
Foto: Balaýsa Musabektiń jeke muraǵatynan

- Dástúrli tehnologııada bir tekshe metr ónimniń ózindik quny 47 238 teńge bolsa, usynylǵan tehnologııada – 41 328 teńge. Osylaısha ár tekshe metrden 5 910 teńge únemdeledi. Jylyna 10 myń tekshe metr ónim óndirilse, jalpy eseppen 59,1 mıllıon teńge únemdeýge bolady. Jobamyzdyń tájirıbelik nátıjesi retinde Qyzylorda qalasynyń sol jaǵalaýyndaǵy turǵyn úıdiń aýlasyna tósenish taqtaıshalary tóseldi. Baqylaý barysynda olardyń betinde kózge kórinetin jaryqtar men synyqtar baıqalǵan joq. Eger jobamyz qoldaý tapsa, biz úsh jyl boıy kelisimshart negizinde jumys istep, ony óndiriste júzege asyra alamyz, - dedi stýdent.

Keıipkerimiz ony óndiriske engizbes buryn zııandy elementterdiń shaıylýyna qosymsha ekologııalyq saraptama júrgizýdi jón sanaıdy. Óndiristi iske qosý úshin arnaıy jabdyqtarmen qamtylǵan óndiristik jeli, óndiristik alań jáne bastapqy ınvestıtsııa qajet. Sodan keıin ǵana zerthanalyq nátıjelerdi óndiris jaǵdaıynda synaqtan ótkizip, tehnologııany qoldanysqa engizý josparlanyp otyr.

Buǵan deıin habarlaǵanymyzdaı, mańǵystaýlyq bıolog Saıasat Kemalova jýsannan hosh ıisti dıffýzor ázirleýdi qolǵa aldy.