Qyzylordalyq stýdent úıinde jylan asyraıdy
QYZYLORDA. KAZINFORM — Qazanǵap atyndaǵy Qyzylorda mýzykalyq joǵary kolledjiniń 4-kýrs stýdenti Nursultan Ikramov úsh jyldan beri úıinde jylan asyraıdy. Ol Kazinform tilshisine bala kúngi armanyna qalaı qol jetkizgenin, jylan asyraýdyń qıyndyǵyn aıtyp berdi.
Keıipkerimiz baýyrymen jorǵalaýshynyń boıyndaǵy mıfologııalyq ańyzdarda sýretteletin qasıetter, eń bastysy, sulýlyǵy men qımyl-qozǵalysy eliktirgenin jetkizdi.
— Qyzyǵýshylyǵymdy ata-anam birden quptaǵan joq. «Adam soǵan da qyzyǵa ma, shaǵyp alady» dep meni qorǵaǵandaı boldy, jolatqysy kelmedi. Jaqsy ma, jaman ba, bilmeımin, biraq meniń neni maqsat etsem, soǵan jetpeı tynbaıtyn qasıetim bar. Sodan úsh jyl buryn týǵan kúnime arnap ózime ózim jylan syıladym. Muny estigen ákem maǵan renjip, úsh kún boıy bir-birimizben sóılespeı júrdik. Keıin ákem de, anam da jibı bastady. Olar da jylandy jaqsy kórip ketti, — dedi Nursultan Ikramov.
Qazir onyń qolynda jylannyń úsh túri bar. Biriniń uzyndyǵy 2 metr bolsa, qalǵan ekeýiniki 1 metrden asady. Barlyǵy sertıfıkattalǵan, zańdy. Ýy joq, demek, adamǵa esh zııansyz.
Tipti qojaıynymen birge anımator ortalyǵynda qoıylymdarǵa qatysady. Adamdarǵa ábden úırengen.
— Asyrandy jylan adamdardan qoryqpaıdy, qolǵa alǵanda agressııa tanytpaıdy. Úı jylany 20-25 jylǵa deıin ómir súredi. Al jabaıy jylandar 10-15 jyl ǵana. Óıtkeni qoregi birde bar, birde joq degendeı. Úı jylanynyń jaǵdaıyn jasaǵasyn uzaqtaý ómir súredi. Jabaıy jándikte ınfektsııa bolýy múmkin. Jabaıy tabıǵatta ne jep jatqanyn bilmeımiz. Men óz jylanyma laboratorııalyq jaǵdaıda ósirilgen tyshqan, ıaǵnı taza tamaq beremin, — dedi keıipkerimiz.
Eń alǵashqy jylandy 130 myń teńgege satyp alǵan. Óziniń kózi qyp-qyzyl, shaǵyn ǵana eken. Nursultan Ikramov ony qolyna alǵan, deneni aınaldyra oraǵan kezdegi áser esten ketpeıtinin aıtty. Jylandy aptasyna bir ret egeýquıryqpen qorektendiredi. Bir egeýquıryqtyń baǵasy 2,5-3 myń teńge aralyǵynda.
Tsırkte óner kórsetý týraly oıy bar-joǵyn suraǵanymyzda birden qarsylyq tanytty.
— Biz ádette jylan ustaǵan adamdy tsırkte ǵana kórip úırengenbiz. Biraq maǵan tsırkte jumys isteý múldem unamaıdy. Olardy erkinen tys qamaýǵa, trıýkter úshin tamaq bermeı júrýge, kúshpen kóndirýge qarsymyn. Meniń jylanym dombyranyń únin jaqsy kóredi. Arasynda terrarıýmnan bosatyp, erkindikke shyǵaramyn. Úıdiń ishin aınalyp júredi. Dombyra tartsam, soǵan oralady. Jylannyń qulaǵy estimegenmen bul qasıet onyń tiline berilgen. Tilin únemi sýmańdatyp syrtqa shyǵaryp júrýiniń sebebi tilimen sezip bile alatynynda, — dedi ol.
Buǵan deıin biz Qyzylordada burynǵy polıtseı basseınde bekire ósirip júrgenin jazǵan edik.